Gaur, zatoz Tabakalerara, eta egin 'Faktoria' gurekin!

Gaur, zatoz Donostiako Tabakalerara, eta egin 'Faktoria' magazina gurekin! Manu Etxezortuk gidatzen duen irratsaioa estudiotik aterako da. Izan ere, larunbatean urtebete beteko du Ubik sorkuntza liburutegiak, eta, urteurren hori ospatzeko, 'Faktoria' saioko lantaldeak Tabakalera hartuko du gaur. Bertara bazoaz, irratsaioa nola egiten dugun ikusiko duzu, eta zuzenean lagundu diezagukezu, gainera, magazina osatzen.Tabakalerako eta Ubikeko arduradunekin hitz egingo dugu, eta, gainera, Piano bat Danirentzat ekimena zertan den kontatuko digu Erik Gonzalezek, eta Josu Txapartegik pianoa joko du zuzenean.

Saioa 07:00etan hasiko da, eguneko albiste nagusien errepasoarekin. 08:00etan, Maite Artolak hartuko du 'Albiste Faktoria'ren gidaritza. 08:30ean, solasean arituko dira Mikel Aramendi, Felipe Juaristi eta Maite Ubiria. 09:00etako albiste errepasoaren ostean, Fernando Aranbururen Patria liburua izango dute hizpide. Best-seller bihurtu da Euskal Herrian, hainbat herri eta hirietako liburutegi eta liburu-dendatan ziurtatu digutenez. Liburu horren alde literarioaz eta Euskal Herriko historia gertukoaz egiten duen errelatoari buruzko ikuspegiaz gogoeta egingo digute Iban Zaldua eta Ramon Etxezarreta idazleek. 09:40 aldera, Jon Sarasuaren gogoeta tartea izango dugu.

10:00etan, Manu Etxezortuk hartuko du lekukoa Tabakaleratik. Hasteko, Garbiñe Ustarroz kultur kudeatzaile eta Ubikeko harrera egileak egingo digu ongietorria. Jarraian, Mikel Gartziak eta Jurdan Arretxek asteko titularrak aztertuko dituzte. Kirol aurrerapena egin ondoren, Urdaibai Bird Center zentroarekin bat egingo dugu, Edorta Unamunorekin hitz egiteko.

11:00etan, Ane Rodriguez Tabakalerako zuzendaria eta Arantxa Mariscal Ubikeko zuzendaria izango ditugu gurekin, baita Tabakalerako Kutxa Kultur egonaldia egiten ari den Saioa Matxain moda diseinatzailea ere. 11:30ean, Garbiñe Agiriano psikologoaren tartea zabalduko dugu.

12:00etan, Ane Muñozen zinemarako proposamena entzungo dugu. Ondoren, Piano Bat Danirentzat ekimena zertan den kontatuko digu Erik Gonzalezek, eta Josu Txapartegik pianoa joko du, zuzenean. Zinema-aretoetan ikusgai izango diren lanen berri ere jasoko dugu.