Diseinuzko drogen kontsumoaren gorakadaz, ostegunean, 'Faktoria'n

Diseinuzko drogen kontsumoaz ariko gara, ostegunean, 'Faktoria'n. Izan ere, diseinuzko drogen kontsumoa hazi egin da Euskal Herrian, eta orain arte ezagutzen ez ziren droga berriak agertzen ari dira. Espainiako ordezkaritzak Euskadin duen laborategiko zuzendari Ane Bañuelosek eta Ai Laket elkarteko Unai Perez De San Romanek emango dizkigute droga berriei buruzko jakingarriak. Gainera, Aurrekontuak aurrera ateratzeko Jaurlaritzak Alderdi Popularraren babesa izango duela jakin ondoren, Laura Garridorekin hitz egingo dugu. Bestalde, Gipuzkoako Epilepsia Elkarteak eskoletan martxan jarritako Elkar Ezagutzen kanpaina ezagutuko dugu: epilepsia dutenek bazterketarik jasan ez dezaten, informazioa zabaltzeko.

07:00etan hasiko da saioa, eguneko albiste nagusien errepasoa eginez. 08:00etan, Maite Artolak hartuko du albistegiaren gidaritza. 08:30ean, Joseba Arruti, Nerea Azurmendi eta Martxelo Otamendi kazetariak arituko dira aktualitateko gaiei buruz solasean. Solasaldiaren tartean hitz egingo dugu Laura Garridorekin. 09:00etako albisteen errapasoaren ondoren, Markel Olanorekin hitz egingo dugu telefonoz, Carles Puigdemontekin egindako bileraz. 09:30ean, berriz, diseinuko drogei buruzko jakingarriak emango dizkigute.

10:00etatik 13:00etara, berriz, Manu Etxezortuk hartuko du lekukoa, eta magazinak egingo du bidea. Hasteko, Eluska Arrieta eta Iker Urkiola etorriko zaizkigu Gipuzkoako Epilepsia Elkartearen Elkar Ezagutzen kanpainaz hitz egiteko. Jarraian, anisakisa ere izango dugu mintzagai. Kirol aurrerapenaren ostean, Markos Zapiainen filosofia eskola jasoko dugu.

11:00etan, Mikel Chamizoren biografia musikatuaren tartea zabalduko dugu, Carmelo Bernaolaz aritzeko. Maysharekin ere ariko gara, astero legez.

12:00etan, atsolorra berreskuratzeko Oiartzunen egiten ari diren ahaleginaren berri emango digute bertako Udaletik. San Jose eguneko trikiti jaialdiaz arikio gara gero, eta, 12:30ean, zaharren egoitzak alaitzen boluntario dabiltzan Nagusilaneko bi musikari ere etorriko zaizkigu goiza poztera, zuzenean musika eskainita: Joxe Inazio Murua eta Roberto Alvarez.

07:00etatik 13:00etara izango dugu martxan 'Faktoria'.