Martin Aranburu, Artur Masen aholkularia, asteartean, 'Faktoria'n

Martin Aranburu elkarrizketatuko dugu asteartean 'Faktoria' saioan. Artur Masen aholkularia da, eta Puigdemont Kataluniako presidenteak iragarriko duenaz galdetuko dio Maite Artolak. Gainera, alokatutako etxeen burbuila sortzen ari den aztertu dugu Alfonso Gomez Bizkaiko Etxebizitza ordezkariarekin, eta sexu hezkuntzak pornoa kontuan hartu beharko lukeen ere bai, Amalia Barquin Mondragon Unibertsitateko irakaslearekin, Ana Txurruka Medeak taldeko kidearekin eta Mikel Oribe sexologoarekin.

07:00etan hasiko da saioa eguneko albiste nagusien errepasoarekin. 08:00etan, Maite Artolak hartuko du gidaritza, eta Niko Cuenca ekonomistarekin hitz egingo dugu, hasteko. Jarraian, hezkuntzako grebaren berri emango dugu Donostiako institutu bateko ataritik. 08:30ean, solasaldian izango ditugu Laura Mintegi, Mikel Aramendi eta Javier Diaz Noci, eta Martin Aranbururekin hitz gingo dugu Kataluniaz. 09:00etako albiste errepasoaren ostean, alokatutako etxebizitzen ustezko burbuilaz ariko gara. 09:30ean, pornoa sexu hezkuntzan sartu behar den aztertuko dugu. Gainera, Eli Larrinagaren sinadura ere jasoko dugu.

10:00etan, Manu Etxezortuk hartuko du lekukoa, 'Faktoria Magazina' abiatzeko. Lehenik eta behin, futboleko elastikoak izango ditugu hizpide Joseba Kamio publizistarekin, erakusleiho bikaina baitira markentzat. Jon Sanchezek aktualitatea puri-purian ekarriko digu gero, eta, kirol aurrerapena entzun ondoren, 'Ekosfera' saioaren leihoa zabalduko du Jokin Aldazabalek, Bizkaiko Zero Zabor Plataformaren helburu eta aldarrikapenak ezagutzeko.

11:00etan, tartea egingo diogu memoria historikoari. Joseba Ezeolazak idatzi duen Camino Oscoz y otras historias del 36 liburua ezagutuko dugu; Camino Oscoz irakaslearen bizitza, bereziki. Bortxatu eta fusilatu egin zuten. 11:30ean, Carlos Cid eta Xabier Amuriza direnez eta ez direnez arituko dira. Bakardadea izango dute gai nagusi.

12:00etan, 'Sukaldari Dema' izango dugu Pili Manterola eta Igor Zalakain sukaldariekin. Gereziak prestatuko dituzte. Saioa amaitu aurretik, Amancay Gaztañagarekin ere hitz egingo dugu.