Albisteak
Asteartean
Izatezko bikoteek Euskal Herrian izan duten bilakaera, 'Faktoria'n
Guns N' Rosesen kontzertuaren atarikoak emango dizkigu Asier Alea Bizkaiko Kanpo Sustapenerako eta Turismorako zuzendari nagusiak, eta Burusoilen Elkartea eta Queer mugimendua ezagutuko ditugu.
Izatezko bikoteek Euskal Herrian izan duten bilakaera aztertuko dugu 'Faktoria' saioan asteartean, eta galdetuko dugu, ezkondutako bikoteekin alderatuta, guztiz berdindu ote diren eskubideak. Ia hogei urte dira bikoteen arteko lotura horiek arautzen hasi zirela: Ipar Euskal Herrian aitzindariak izan ziren, 1999tik baita han indarrean Elkartasuneko Hitzarmen Zibila edo PACS delakoa. Nafarroara urtebete geroago iritsi zen legedia. Araban, Bizkaian eta Gipuzkoan, berriz, 2003an onartu zen izatezko bikoteen araudia. Iban Ugarte abokatu espezialistaren laguntzaz aztertuko dugu gaia 09:30ean. Gainera, Guns N' Roses taldearen kontzertuaren atarikoak emango dizkigute Bilbotik, eta Burusoilen elkartea eta Queer mugimendua ezagutuko ditugu.
07:00etan hasiko da saioa eguneko albiste nagusien errepasoarekin. 08:00etan, Iñigo Alustizak hartuko du gidaritza, eta, hasteko, Asier Alea Bizkaiko Foru Aldundiko Turismorako eta Kanpo Sustapenerako zuzendari nagusiak Guns N' Roses taldeak San Mamesen emango duen kontzertuaren xehetasunak emango dizkigu. 08:30ean, solasaldian izango ditugu Maite Ubiria, Mikel Aramendi eta Javier Diaz Noci. 09:30ean, izatezko bikoteak izango ditugu hizpide Iban Ugarte abokatuarekin. Gainera, Eli Larrinagaren sinadura ere jasoko dugu.
10:00etan, Ainhara Zuazabeitiak hartuko du lekukoa, 'Faktoria Magazina' abiatzeko. Lehenik eta behin, Burusoilen Elkartearen berri emango digu Txentxo Muñozek. Jon Sanchezek puri-purian dauden albisteak ekarriko dizkigu gero, eta, kirol aurrerapena entzun ondoren, 'Ekosfera' saioaren leihoa zabalduko du Jokin Aldazabalek.
11:00etan, Queer mugimendua zer den eta zer aldarrikatzen duten ere jakingo dugu, Alan Ruizen eta Imanol Ibarrolaren bitartez. 11:30ean, Carlos Cid eta Xabier Amuriza direnez eta ez direnez arituko dira. Futbolaren 'mixeriak' izango dituzte hizpide.
12:00etan, 'Sukaldari Dema' izango dugu Pili Manterola eta Igor Zalakain sukaldariekin. Izokina prestatuko dute. Saioa amaitu aurretik, Amancay Gaztañagarekin ere hitz egingo dugu.
