Arkaitz Rodriguez, Sortuko bozeramailea, 'Faktoria'n

Sortuk asteburu honetan Konferentzia Politikoa egin ondoren, Arkaitz Rodriguez alderdiaren bozeramailea elkarrizketatuko du Maite Artolak asteleheneko 'Faktoria'n. Ramon Etxezarreta, Edurne Egaña eta Julen Mendoza arituko dira solasaldian, eta albistegiaren errematea, astelehenero bezala, Bernardo Atxagak egingo du. Gainera, magazinean, Nahia Sasko Lizardi saria irabazi duen Lekuine udalerriko bertsolari gazteari egingo dio elkarrizketa Manu Etxezortuk, eta hainbat disziplina uztartuz euskal artista ezagunek egindako Topaketalk performancea ere ezagutuko dugu.

07:00etan hasiko da albistegia, Igotz Alkortaren gidaritzapean. 07:50ean, Maite Artolak hartuko du gidaritza, eta Maialen Arzallusen zutabea entzungo dugu. 08:00etan, Niko Cuencaren ekonomia tartea izango da, eta 08:30ean solasaldian izango dira Ramon Etxezarreta, Julen Mendoza eta Jose Ramon Beloki. 09:00etako albiste errepasoa egin ondoren, Begoña Del Tesok Zinemaldiaren errepasoa egingo digu, eta, jarraian, Sortuko Arkaitz Rodriguezen elkarrizketa entzungo dugu. 09:30ean, arrautzen krisiaren goi bileraren bezperan, Arantza Madariaga Elikako arduradunarekin hitz egingo dugu. Albistegia amaitzeko, Bernardo Atxagaren iritzi tartea entzungo dugu.

10:00etan, Manu Etxezortuk hartuko du magazinaren gidaritza. Hasteko, asteburuko kirol emaitza eta gertakizun guztiak aztertuko dituzte Andoni Urbistondok eta Beñat Zarrabeitiak kirol solasaldian. 10:30ean, Martin Gartziandia Gasteizko sindikoak hainbat zalantza argituko digu. 11:00etan, Zinemaldira joko dugu Arkaitz Basterra eta Gorka Otaegirekin. Kirol aurrerapenaren ostean, Xabier Alberdi 'Euskaldunak eta itsasoa' hamabosteroko kolaborazioarekin etorriko da, eta Elkano itsasgizonaren bizitzaz jardungo du. 11:30ean, Nahia Saskorekin arituko gara Lizardi sariaz. 12:00etan, Kutxa Ekogunea tartean, Abeletxea izango dugu hizpide. Jarraian, Topaketalk, hainbat disziplina uztartuz euskal artista ezagunek egindako performancea, ezagutuko dugu. Iñaki Perurenak kontatuko digu nolakoa izan den bertan Kepa Junkerarekin batera parte hartzea. Joseba Bartolome Mondragon Linguako komunikazio arduradun eta egitasmoaren antolatzailearekin ere hitz egingo dugu. Saioa amaitzeko, Tania Arriagaren 'Harriadak' entzungo ditugu, eta lehiaketa izango dugu.

07:00etatik 13:00etara izango da martxan 'Faktoria'.