Puigdemonten agerraldiaren biharamunean, 'Faktoria' berriz ere Kataluniatik

Carles Puigdemontek Kataluniako Parlamentuan egingo duen agerraldiaren biharamunean, Bartzelonatik egingo dugu 'Faktoria' albistegia. Maite Artolak eta bere lantaldeak aztertuko dute gertaten ari den guztia. Gainera, magazinean, Euskaltzaindiak Gabriel Arestiri eskainitako jardunaldiaz hitz egingo dugu Jon Kortazarrekin, bera delako Arestiren lanean aditua. Bestalde, Joan Mari Irigoien idazlearen omenez kaleratu duten Antzinako Zuhaitza cd-liburuaz hitz egitera etorriko zaizkigu, Xabier Zabala musika konpositorea eta Pirritx eta Porrotx pailazoak.

07:00etan hasiko da albistegia, Igotz Alkortaren gidaritzapean. 07:50ean, Maite Artolak hartuko du lekukoa Bartzelonan, eta Eli Larrinagaren iritzi tartea entzungo dugu. 08:30ean, Martxelo Otamendi, Iker Rioja eta Nerea Azurmendi izango ditugu solasaldian, Kataluniako egoeraren analisia egiten. 09:30ean, ekonomia tartea zabalduko dugu Adrian Zelaia eta Lander Beloki adituekin .

10:00etan, Manu Etxezortuk hartuko du lekukoa, magazina abiatzeko. Hasteko, Jon Kortazarrkin hitz egingo dugu Euskaltzaindiak Gabriel Arestiri eskainitako jardunaldiaz. Jarraian, Idoia Torregarairen umore printza iritsiko zaigu. 10:30ean, Juanjo San Miguel lankidearekin aztertuko ditugu arma nuklearrak. 11:00etako kirol aurrerapenaren ondoren, Joan Mari Irigoien idazlearen omenez atera duten Antzinako Zuhaitza disko berriaz hitz egitera etorriko zaizkigu Xabier Zabala musikagilea eta Aiora Zulaika 'Pirritx' eta Joxe Mari Agirretxe 'Porrotx'. 11:30ean, Vitoria 3 de marzo filmaren grabazioan izango gara, eta, ondoren, Esther Moyuaren liburu gomendioa entzungo dugu.

12:00etan, Atzegiri emango diogu ahotsa. Boluntario bila dabiltza, eta guregana etorriko dira deialdia egitera. Boluntarioen lana zein izaten den ere gertutik ezagutuko dugu. Jarraian, Guggenheim museoan 20. urtebetetzeko ospakizunen azken txanpan egingo duten 'Reflections' mapping ikuskizunaz hitz egingo digute museoko komunikazio arduradunek. 12:30ean, Imanol Ituiñoren magia izango dugu, astero legez.