Laneko estresa eta antsietatea, 'Faktoria' saioan

Eibarko epaitegiak atera duen epaiaren harira, lantokietan izaten den estresari eta antsietate-krisiei buruz hitz egin nahi dugu, astelehenean, 'Faktoria' albistegian. Eibarko sententziak dio antsietate krisia lan istripu direla. CCOOek eraman du kasua, eta sindikatu horretako lan osasun arduradunak emango dizkigu azalpenak. Argibide gehiago eskatuko diogu, Aitor Gisasolari, Osalanek Gipuzkoan deun lan osasun arloko zuzendariari. Gainera, Nafarroa Oinez jaiaren balorazioa egingo digute antolatzaileek. magazinean, bestalde, suizidioaz hitz egingo dugu Besarkadak elkarteko Karlos Aisarekin, eta Adin Adin programari buruzko xehetasunak emango dizkigu Sebastian Lizasok. Zaharren egoitzetara bertsolariak joateko programa da.

07:00etan hasiko da albistegia, Igotz Alkortak gidatuta. 07:50ean Maite Artolak hartuko du lekukoa, eta Maialen Arzallusen zutabea entzungo dugu. 08:00etan, Nafarroa Oinez jaiaren balorazioa egiteko deituko diogu Joseba Lasarte koordinatzaileari. 08:30ean, solasaldian izango ditugu Julen Mendoza, Ramon Etxezarreta eta Joxe Ramon Beloki. 09:20 aldera izango ditugu hizpide laneko estresa eta antsietate-krisiak. Ordua amaitzeko, Bernardo Atxagaren tartea entzungo dugu.

10:00etan, Manu Etxezortuk hartuko du magazinaren gidaritza, eta, hasteko, asteburuko kirol emaitza eta gertakizun guztiak aztertuko dituzte Andoni Urbistondok eta Beñat Zarrabeitiak kirol solasaldian. 10:30ean, Martin Gartziandia Gasteizko sindikoak hainbat zalantza argituko digu. 11:00etako kirol aurrerapenaren ostean, Xabier Alberdi 'Euskaldunak eta itsasoa' hamabosteroko kolaborazioarekin etorriko da, eta Elkano itsasgizonaren bizitzaz jardungo du berriz ere. 11:30ean, suizidioa hartuko dugu hizpide. 12:00etan, Kutxa Ekogunea tartea zabalduko dugu. Jarraian, Adin Adin ekimenaren berri emateko deituko diogu Sebastian Lizaso bertsolariari. Saioa amaitzeko, Tania Arriagaren 'Harriadak' entzungo ditugu, eta lehiaketa izango dugu.

07:00etatik 13:00etara izango da martxan 'Faktoria'.