Arturo Campionen bizitza, Arabako euskalkia eta 10.000 irribarre ekimena,'Faktoria'n

Arturo Campionen bizitza eta lanari buruz arituko gara 'Faktoria'n, besteak beste, hari hil osteko Nafarroako urrezko domina emateko erabakiak sortu duen eztabaida dela-eta. Emilio Majuelo historialariarekin batera aztertuko ditugu, solasaldiaren tartean, Campionen argiak eta itzalak. Laura Mintegi, Joxerramon beloki eta Javier Diaz Noci izango dira solaskideak. 09:30etan, berriz, Arabako euskalki zaharra nola berreskuratu duten galdetuko dugu.  Gorka Lazkano itzultzailea aritu da lan horretan Errementari filmerako, Koldo Zuazo hizkuntzalariaren aholkularitzaz. Bien esperientzia jasoko dugu. Astearteko albistegia, Itxaso Mendiluze arte komisario eta adituak itxiko du.

10:00etan, Manu Etxezortuk hartuko du gidaritza, magazinari ekiteko. 10.000 irribarre ekimena ezagutuko dugu. Lehen ekitaldia antolatu dute eta Enhamed Enhamed igerilari paraolinpikoa gonbidatu dute hitzaldi batera. Luis Oiartzabal psikologoak azalduko digu zergatia. Jarraian, Maysharen tartea entzungo dugu. 10:30ean, 'Ekosfera' tartea zabalduko dugu Jokin Aldazabalekin.

11:00etako kirol aurrerapenaren ondoren, Nerea Ibarzabal, Xabier Amuriza eta Karlos Ciden tartean galdera hauxe jarriko dugu mahai gainean: Besteen etxeetan gertatzen denak pizten al dizu jakinminik?

12:00etan, 'Sukaldari Dema'n, Iker Lauroba musikari eta abeslariaren hozkailua miatuko dugu eta han aurkitutakoarekin osatu beharko dute menua Pili Manterolak eta Igor Zalakainek. 12:30ean, bestalde, elikadura osasuntsua sustatzeko Eusko Jaurlaritzaren ekimena ere ezagutuko dugu. Bittor Rodriguez, (Elikagaien Zientzia eta Teknologian doktore)  izango dugu gurekin eta gaztetxoei ere galdetuko diegu jateko ohituren inguruan.

07:00etatik 13:00etara, martxan izango da 'Faktoria'.