Aitor Esteban diputatu jeltzalea, 'Faktoria'n

Aitor Esteban EAJk Madrilen duen taldeko bozeramailea elkarrizketatuko dugu astelehen honetan 09:00ak aldera. Gainera, Iruñeko epaiketaz eta indarkeria matxistaren kontrako estatu itunaz hitz egingo digu Ana Mazos abokatuak, eta Oñatitik Erromara bizikletaz joan den Agotz Iturbe ezagutuko dugu.

07:00etan hasiko da albistegia Iñigo Alustizak gidatuta. 07:50 aldera, Maite Artolak hartuko du lekukoa, eta Maddalen Arzallusen sinadura entzungo dugu. 08:00etan, Niko Cuencaren azalpen ekonomikoak entzungo ditugu, eta, 08:30ean, Jose Ramon Beloki, Ramon Etxarreta eta Laura Mintegi arituko dira aktualitateari buruzko analisian, Maite Artolak gidatuta. 09:00etako albiste errepasoaren ondoren hitz egingo dugu Aitor Estebanekin; 09:30ean, Ana Mazos abokatu eta adituak azalpenak emango dizkigu Iruñeko epaiketaz eta indarkeria matxistaren kontrako estatu itunaz. Astelehenero bezala, Bernardo Atxagaren bisita jasoko dugu hamarrak jo aurretik.

10:00etan, Manu Etxezortuk hartuko du magazinaren gidaritza, eta, hasteko, asteburuko kirol emaitza eta gertakizun guztiak aztertuko dituzte Andoni Urbistondok eta Beñat Zarrabeitiak kirol solasaldian. 10:30ean, Martin Gartziandia Gasteizko sindikoak hainbat zalantza argituko digu taxi zerbitzuen aldaketez. 11:00etako kirol aurrerapenaren ostean, itsasgizonen istorioak ekarriko dizkigu Xabier Alberdik. 11:30ean, Agotz Iturberen bisita espero dugu. Oñatitik Erromara bizikletaz joana da. 12:00etan, Kutxa Ekogunea tartea zabalduko dugu, eta, segidan, Xabier Sukiarekin zabalduko dugu Whatsapp bidezko Kopla Txapelketaren tartea. Saioa amaitzeko, Tania Arriagaren 'Harriadak' entzungo ditugu, eta lehiaketa izango dugu.

07:00etatik 13:00etara izango da martxan 'Faktoria'.