Abel Barriola, 'Faktoria'n

Abel Barriola elkarrizketatuko dugu 'Faktoria'n ostiralean. Sabino Arana saria jasoko du igandean, eta, aurretik, magazinean izango dugu. Gainera, Aitor Montes medikuarekin hitz egingo dugu, historial klinikoak euskaraz eska ditzagun bultzatzeko egiten ari diren ahaleginaz.

07:00etan hasiko da albistegia, Igotz Alkortak gidatuta. 07:55 aldera, Iñigo Alustizak hartuko du lekukoa, eta Fabian Laespadaren sinadura entzungo dugu. 08:30ean, Javier Arrieta, Hedoi Etxarte eta Eguzki Urteaga izango ditugu solasaldian, aktualitateari errepasoa egiten. 09:25 aldera, Aitor Montes medikuarekin hitz egingo dugu, eta, jarraian, entzuleen tartea zabalduko dugu. Albistegia amaitzeko, Iban zalduak asteari errepaso musikatua egingo dio.

10:00etan hartuko du lekukoa Manu Etxezortuk. Magazinaren hasieran, astearen prentsa errepasoa egingo digute Jurdan Arretxek eta Mikel Garciak. 10:30ean, Abel Barriolarekin hitz egingo dugu.

11:00etako kirol aurrerapenaren ondoren, Joxe Migel Maizekin arituko gara. Donostiako Nazioarteko Krosa behin bakarrik irabazi du euskal korrikalari batek; duela 50 urte izan zen, eta Maizek lortu zuen garaipena. Hipodromoan bertan hitz egingo dugu berarekin, orduko oroitzapenak bilduz. 11:30 aldera, Ane Muñozen bizitzako pasadizoak entzungo ditugu, eta Natul euskara taldeak Azpeitiko euskalkia, hitzak eta esamoldeak biltzeko kaleratu duten liburuxkaz ariko gara ondoren Eneritz Albizurekin.

12:00etan, asteburuan 'Amarauna' saioan landuko dituzten gaiak aurreratuko dizkigu Gari Udabek. Gero, Urdaibai Bird Centerrera joko dugu Edorta Unamunorekin, eta zinema-aretoetan ikusgai izango diren lanen berri ere emango dugu.

07:00etatik 13:00etara izango da martxan 'Faktoria'.