Irakurzaletasunaz eta kaleko saltzaileen egoeraz, 'Faktoria'n

Gazteak irakurzaletasuna galtzen ari ote diren galdetuko dugu 'Faktoria'n astearte honetan. Haur eta gaztexoak literatura zaletzeko zailtasunez arituko gara, eta ondorioz, irakur gaitasunean somatzen ditugun gabeziez. Leitzako Erleta eskolan zaletasun hori nola lantzen duten ikusiko dugu bertatik bertara, eta galdetuko dugu nola lan egiten duten Bilboko Intxisu ikastola publikoan ere. Mariasun Landa idazlearekin eta urtetan irakasleen irakasle izandakoarekin egingo du, gainera, gogoeta. Bestalde, kaleko saltzaileen egoera ezagutuko dugu. Bilbon protestan ari dira, zergak igo dizkietelako.

07:00etan hasiko da albistegia, Iñigo Alustizak gidatuta. 07:55 aldera, Maite Artolak hartuko du lekukoa, eta Amatiñoren zutabea entzungo dugu. 08:30ean, solasaldian izango ditugu Xabier Riezu, Maite Ubiria eta Iker Rioja. 09:30 aldera hitz egingo dgugu irakurzaletasunaz, eta, ordua ixteko, Itxaso Mendiluze arte komisarioaren kontrazala entzungo dugu.

10:00etan, Manu Etxezortuk hartuko du gidaritza, magazinari ekiteko. Hasteko, Maysha sartuko zaigu San Franciscotik, 'Arts&Science' tartea entzungo dugu, eta, segidan, reggaetoiaren mezuei buruzko erreportajea entzungo dugu. 10:30ean, 'Ekosfera' tartea zabalduko dugu Jokin Aldazabal lankidearekin, Bilbon egingo dituzten jardunaldi ekosozialistez hitz egiteko.

11:00etako kirol aurrerapenaren ondoren, kale saltzaileen egoerari erreparatuko diogu Nerea Ibartzabalen, Xabier Amurizaren eta Karlos Ciden tartean. 12:00etan, 'Sukaldari Dema'n, 'Hiri Gorrian' saioko Ane Mirenen etxeko hozailuan topatuko dituzten osagaiekin proposatuko dituzte errezetak Pili Manterolak eta Igor Zalakainek. 12:30ean, gainera, 'Musika eta bizitza' tartean, Agus Barandiaran arituko zaigu.

07:00etatik 13:00etara, martxan izango da 'Faktoria'.