Errusia hobeto ezagutuko dugu 'Faktoria'n

Errusiako hauteskundeen atarian, errusiar gizartea ondo ezagutzen duten bi euskaldunekin hitz egingo dugu, ostegunean, 'Faktoria', Moskun bizi diren Ainhoa Ayerberekin eta Xabier Azpillagarekin. Bestalde, Athletic-Olympique polizia operatiboaz ariko gara Josu Bujanda Ertzaintzako Herritarren Babeserako Segurtasun arduradunarekin.

07:00etan hasiko da saioa, Iñigo Alustizaren gidaritzapean. 07:50 aldera, Maite Artolak hartuko du lekukoa, eta Aingeru Epaltzaren sinadura entzungo dugu. 08:00etan, Josu Bujandarekin hitz egingo dugu, eta, 08:30ean, Nerea Azurmendi, Martxelo Otamendi eta Joseba Arruti izango ditugu solasaldian, aktualitateari errepasoa egiten. 09:30 aldera, berriz, 'Birziklatzearen katebegiak' erreportaje sortako laugarrena ekarri digu Tere Beloki lankideak: organikoa.

10:00etan, magazina jarriko du martxan Manu Etxezortuk. Hasteko, Mireia Roca arkitektoak Donostiako Trinitate plaza aztertuko du, eta, 10:30ean, Trivial feminista ekarriko digu Gorka Otaegi lankidea. Jarraian, Markos Zapiainek filosofiaren historia gaurkotuko digu. 

11:00etako kirol aurrerapenaren ondoren, Mikel Chamizo musika konposatzaile eta kazetariren tartea izango dugu, eta, 11:30ean, Nerea Reparaz, EiTBk Frantzian duen berriemailea, sartuko zaigu, Bertrand Cantat kantariaz hizpide hartuta: bere bikotekide Marie Trintignanten erailketagatik zortzi urteko kartzela zigorretik lau bete ostean, disko berria grabatu du eta kontzertu-bira bertan behera utzi du, haren kontrako protesten ondorioz.

12:00etan, Errusia hobeto ezagutuko dugu. Asteburuan izango dituzte hauteskundeak, eta bertako gizartearen berri izateko, Moskun bizi diren Ainhoa Ayerberekin eta Xabier Azpillagarekin hitz egingo dugu. 12:30ean, berriz, 'Musika eta BIzitza' tartean, Amancay Gaztañaga izango dugu.

10:00etatik 13:00etara izango da martxan 'Faktoria'.