Jose Ignacio Asensio, Gipuzkoako Ingurumen diputatua, 'Faktoria'n

Jose Ignacio Asensio Gipuzkoako Foru Aldundiko Ingurumen diputatua izango da asteleheneko 'Faktoria'ko gonbidatu nagusia. 09:30etik aurrera erantzungo die Maite Artolak egingo dizkion galderei. Gainera, gertutik jarraituko dute Frantziako tren zerbitzuetako langileek deitutako greba eta hurrengo asteburuan ehiztariek deitu dituzten mobilizazioetara begira ere jarriko gara. Bestalde, Bilbo Zaharrean antolatu duten Hiritar Laborategiaren berri emango dugu.

07:00etan hasiko da albistegia. 07:50 aldera, Maite Artolak hartuko du lekukoa, eta Maddalen Arzallusen sinadura izango da. 08:30ean, Ramon Etxezarreta, Jose Ramon Beloki eta Laura Mintegi arituko dira aktualitateari buruzko analisian. 09:00ak aldera, Hendaiako tren geltokiarekin bat egingo dugu, bertan izango delako Oihane Yustos lankidea, Frantziako tren zerbitzuetako grebaren berri emateko. 09:20 aldera, Gipuzkoako Ehiztarien Federazioko koordinatzaile nagusiarekin hitz egingo dugu datorren asterako deitu dituzten mobilizazioen atariko, eta, albistegia amaitzeko, Bernardo Atxaga entzungo dugu.

10:00etan, Manu Etxezortuk hartuko du magazinaren gidaritza, eta, hasteko, asteburuko kirol emaitza eta gertakizun guztiak aztertuko dituzte Andoni Urbistondok eta Beñat Zarrabeitiak kirol solasaldian. 10:30ean, Bilboko Urban Bat Hiri Berrikuntza Bulegoko Gorka Rodriguezek Bilbo Zaharrean antolatu duten Hiritar Laborategiaren berri emango digu. Hain zuzen ere, auzoaren antolaketaren inguruan hiritarren parte-hartze prozesu bat da Hiritar Laborategia.

11:00etako kirol aurrerapenaren ostean, esnearen eta esnekien azkenaldiko ospe txarraz jardungo dugu Bittor Rodriguez EHUko Farmazia Fakultateko irakaslearekin eta zalantzak argitzen saiatuko gara esnearen inguruko egia ezagutu eta mitoak baztertzeko. 11:30ean, Aranzadi Zientzia Elkartean antolatutako Txori Soinu Ikastaroaren berri emango digute Mikel Olano eta Maite Laso ornitologoek.

12:00etan, Kutxa Ekogunea tartea zabalduko dugu, eta, segidan, plataforma digitalek gure ikus-entzunezko kontsumoan sortu duten iraultzaz ariko gara. Saioa amaitzeko, Tania Arriagaren 'Harriadak' entzungo ditugu, eta lehiaketa izango dugu.

07:00etatik 13:00etara izango da martxan 'Faktoria'.