Juan Carlos Perez, 'Faktoria'ko gertuko elkarrizketan

Juan Carlos Perez kantari, musikari eta konpositorea izango da ostiral honetako 'Faktoria'ko gonbidatu nagusia. Musika klasikoaren bidean ari da aspaldi, eta euskarazko opera bat prestatzen buru-belarri ari da lanean orain, Kirmen Uriberekin batera: 'Saturraran'. Horren musika eta ibilbidea aztertuko ditugu, Maite Artolarekin solasean. Gertutik egindako elkarrizketa izango da, 09:30etik aurrera. Bestalde, Universitario Bilbao Rugby klubeko presidente Aitor Jauregi elkarrizketatuko dugu, eta, ondoren, 12:00etan, Bilbon, Europako errugbi txapelketen finalak direla-eta antolatu duten fanzone edo zaleentzako guneetako batera egingo dugu bisita.

07:00etan hasiko da albistegia, Iñigo Alustizak gidatuta. 07:55 aldera, Maite Artolak hartuko du lekukoa, eta Garbiñe Ubedaren sinadura entzungo dugu. 08:30ean, Javier Arrieta, Eguzki Urteaga eta Hedoi Etxarte izango ditugu solasaldian, aktualitateari errepasoa egiten. 09:15ean, Roman Suduperen elkarrizketa izango dugu.

10:00etan hartuko du lekukoa Manu Etxezortuk. Magazinaren hasieran, astearen prentsa errepasoa egingo digute Jurdan Arretxek eta Mikel Garciak. Ondoren, Universitario Bilbao Rugby klubeko presidente Aitor Jauregi elkarrizketatuko dugu.

11:00etako kirol aurrerapenaren ondoren, Gasteiz-Txina-Gasteiz bizikletaz egin duen Yolanda Muñoz ezagutuko dugu, eta, jarraian, Jabier Zubiri Donostiako arkitekto gaztearekin hitz egingo dugu. Parentesia izeneko bere instalazioa New Yorkeko Times Squaren dago ikusgai.

12:00etan, Bilbon, Europako errugbi txapelketen finalak direla-eta antolatu duten fanzone edo zaleentzako guneetako batera egingo dugu bisita, eta, segidan, asteburuan 'Amarauna' saioan landuko dituzten gaiak aurreratuko dizkigu Gari Udabek. Ondoren, Urdaibai Bird Centerrera joko dugu Edorta Unamunorekin, eta zinema-aretoetan ikusgai izango diren lanen berri ere emango dugu.

07:00etatik 13:00etara izango da martxan 'Faktoria'.