'Etiopia-utopia' proiektua eta braille hizkuntza, 'Faktoria'n

Ostiral honetan, gai asko jorratuko ditugu 'Faktoria'n. Albistegian, esaterako, Imanol Apalategi mediku eta 'Etiopia-utopia' proiektuaren burua elkarrizketatuko dugu 09:30ean. Magazinean, gainera, Natalia Etxarri Donostiako Udaleko Osasun Publikoaren Zerbitzuko albaitariak arratoiak akabatzeko metodo eraginkorrenak azalduko dizkigu. Bestalde, braille hizkuntza nola ikasten den kontatuko digute ONCEko irakasle eta ikasleek.

07:00etan hasiko da albistegia, Iñigo Alustizak gidatuta. 07:55 aldera, Maite Artolak hartuko du lekukoa, eta Fabian Laespadaren iritzia entzungo dugu. 08:30ean, Javier Arrieta, Eguzki Urteaga eta Hedoi Etxarte izango ditugu solasaldian, aktualitateari errepasoa egiten. 09:30 aldera, Imanol Apalategi medikuarekin hitz egingo dugu.

10:00etan hartuko du lekukoa Manu Etxezortuk. Magazinaren hasieran, asteko prentsaren errepasoa egingo digute Jurdan Arretxek eta Mikel Garciak. Ondoren, arratoiak akabatzeko metodo eraginkorrenak zein diren azalduko digu Natalia Etxarrik.

11:00etako kirol aurrerapenaren ondoren, Herria astekariko zuzendari Peio Jorajuriari elkarrizketa egingo diogu: 25 urte egin ostean, erretreta hartuko du. 11:30 aldera, Ane Muñozen bizitzaren pasadizoak entzungo ditugu, eta ONCEn grabatutako erreportajea emango dugu gero.

12:00etan, asteburuan 'Amarauna' saioan landuko dituzten gaiak aurreratuko dizkigu Unai Urreagak. Ondoren, Urdaibai Bird Centerrera joko dugu Edorta Unamunorekin, eta zinema-aretoetan ikusgai izango diren lanen berri ere emango dugu.

07:00etatik 13:00etara izango da martxan 'Faktoria'.