‘Ikasenpresa’ proiektua ezagutuko dugu gaur ‘Faktoria’n

8:00etan emango diogu hasiera gaurko ‘Faktoria’ri, Euskadi Irratiko orduz orduko informazio zerbitzuarekin. 8:30ean hasiko den solasaldian, Joseba Arruti, Hedoi Etxarte eta Fermin Munarriz izango ditugu egunotako gaien errepasoa egiten.

9:00ak aldera, ‘Etxerat’eko Urtzi Errazkin izango dugu gonbidatu Miramongo estudioetan. Jarraian, ekonomia tertulian, Lander Beloki eta Urbegi enpresako Sonia Erkoreka izango ditugu solasean. 9:50ean, Maialen Lujanbioren asteroko 'Sinadura'z gozatzeko aukera izango dugu.

Magazinean, 10:00ak aldera, Bergarako organoa konpontzeko antolatu duten apadrinamendu kanpainaz mintzatuko gara, Aitor Olearekin.

11:00etan, ‘Ikasenpresa’ proiektuaz hitz egingo dugu irakasle eta ikasleekin. Egitasmo honen bitartez, lanbide heziketako ikasleek enpresa bat nola sortzen den ikasten dute. Ordu erdi geroago, ETB1eko ‘Eskamak Kentzen’ telesailaren estreinaldirako sarrerak banatuko ditugu.