'Faktoria', Eibarren

'Faktoria'ko unitate ibiltaria Eibarrera mugituko da ostegun honetan. Ordurako erabakia izango du Eibar Futbol Taldeko akziodunen batzarrak, Azitain edo Areitio, zein kirol-azpiegitura proiektu eraikiko duten.  Herritarrek eta udal agintariek zer dioten jasoko dugu bertatik bertara

Ostegunero legez, Nerea Azurmendi, Martxelo Otamendi eta Joseba Arruti arituko dira solasaldian eta, aste honetan, Alberto Lopez Basaguren Konstituzio Zuzenbideko katedraduna ere batuko zaie, bera sustatzaile nagusietariko bat duen ‘Euskal Federalistak’ plataformaren helburuak zein diren azaltzeko.

Goizeko hamarrak aurretik Joseba Belaustegi GuraSOS elkarteko ordezkariri egingo diote elkarrizketa, Gipuzkoako erraustegi proiektuaren kontrako beste elkarte eta sindikatuekin batera larunbaterako deitu duten manifestazioaren atariko.

Eguneko sinadura Aingeru Epaltzak jarriko du goizeko 08:00etako albistegiaren aurretik.

10:00etako albisteen ostean ekingo dio Manu Etxezortuk magazinari. Hasteko, aktualitateari begira jarriko zaizkigu Mikel Garcia eta Jurdan Arretxe kolaboratzaileak. Gero, Euskaraldiko istorioei egingo diegu tartean, Itziar Ituño aktorearekin egingo dugu berba. Euskararen mugak Argentina eta Brasileraino zabaldu ditu Paperezko etxea (La casa de papel jatorrizkoan) serie ezagunaren arrakastari esker.

11:00etako albistegiaren ostean, amatasuna baserrian nola bizi duen azalduko digu Tolosako Isastegi Goikoa baserriko Begoña Aristik. Horren ostean, itsasoaz ariko zaigu Xabier Alberdi kolaboratzailea. Segidan, Andoitz Azurmendi Sagastibeltza kirolari gazteak kontatuko digu fisikokulturismo eta fitnessari esker bulimia nola gainditu duen.

12:00etan, osagai gordineko errezetak ekarriko dizkigu Jurgi Arejita sukaldariak, eta, jarraian,  Labclin 2018 Laborategi klinikoen jardunaldiei eta Homeless Film Festivali egingo diegu tartea. Saioa bukatzeko, Urdaibai Bird Centerrera joko dugu Edorta Unamunorekin, eta lehiaketa izango dugu.

07:00etatik 13:00etara izango da martxan 'Faktoria'.