'De Puertas Adentro' saio berria estreinatuko du Radio Euskadik Aste Santuan

'De Puertas Adentro' Teresa Yustak gidatuko duen Radio Euskadiko irratsaio berriak genero-indarkeria izango du hizpide nagusi. Genero heziketari eskainitako tartean zer esan handia duten adituek hartuko dute parte, gaiari sakon heltzeko. Teresa Yustaren hitzetan, "testigantza gogorrak entzungo ditugu, baina oso baikorrak gehienetan… Gizarte gaitz honen arrazoiak aztertuko ditugu. Bestalde, gizonei ahotsa emateak ere berebiziko garrantzia izango du; izan ere, gizarte osoari eragiten dion arazo larria da hau".

Lehenbiziko saioa ostegunean izango da, martxoaren 29an. Teresa Yustak hiru gonbidatu nagusi elkarrizketatuko ditu: Izaskun Landaida, Emakundeko zuzendaria; Susana Gisbert, genero-indarkerian aditua den fiskala, eta Teresa San Segundo, Urruneko Hezkuntzako Unibertsitate Nazionaleko Genero Ikasketen Zentroko zuzendaria. Mahai-inguruan, Kongresuan eta Senatuan aurkeztutako hainbat proposamen eztabaidatuko dituzte.

Ostiralean, martxoak 30, indarkeria mota horren eragileak aztertuko dituzte. Horretarako, Blanca Estrella Clara Campoamor elkarteko presidentea, Amparo Huélamo kriminologian aditua, Javier Madina Salustiano psikologoa eta Soledad Murillo de la Vega Berdintasun Politiken idazkari nagusia hartuko dituzte solaskide.

Igandean, apirilaren 1ean, berriz, 'De Puertas Adentro' irratsaioa heziketaren inguruan arituko da. Horretarako, Teresa Yustak Lucia Torrealday Hezkuntza Berriztatzeko zuzendaria elkarrizketatuko du. Bestalde, Maria Soleto Mujeres fundazioko zuzendariarekin eta Adolfo Lacuesta Proyecto Solidario fundazioko presidentearekin mintzatuko dira. Bukatzeko, Pamela Palenciano genero-indarkeriaren biktima eta 'No solo duelen los golpes' bakarrizketaren sortzailea izango dute mikrofonoetan.

Aste Santuko egunetan, 21:00etan izango da entzungai Teresa Yustaren 'De  Puertas Adentro' irratsaio berria Radio Euskadin. Ondoren, larunbatero emango dute, 17:00etan.