Arrauna
Igandean, zuzenean
Kontxako Bandera, lehen erasoaldia
L.E.
Portugaletek sailkapen estropadan egindako balentriaren ostean, sailkatutako zortzi traineruek lehen bataila borrokatuko dute bihar, Donostiako uretan. Zuzenean, eitb.comen eta ETB-1en.
-
Kaikuk iaz lortutako garaipena errepikatu nahi du Donostiako Banderan. Efe.
Donostiako badian festa izango da nagusi igandean, Kontxako estropadaren lehen jardunaldian. Portuko inguru guztiak arraunzaleez lepo izango dira, urtero legez, denboraldiko hitzordurik garrantzitsuenetarikoan.
Portugalete, Orio, Kaiku, Urdaibai, Hondarribia, San Pedro, Tiran eta Donostiarra izango dira protagonista, denboraldiko bandera preziatuena irabazteko lehian.
Faboritoak borrokarako prest eta gogoz daude: Kaiku, denboraldi borobila egiten ari dira bizkaitarrak; Urdaibai, azken asteetan behetik gora dator Bermeoko trainerua; Orio, Kontxako klasikoetako bat; eta, zergatik ez, Portugalete. Bizkaitarrek balentria egin zuten sailkapeneko estropadan denborarik onena eginda eta Kontxako estropadarako lehen postuan sailkatuta.
Kaiku eta Urdaibai
Bizkaiko ontziek garaipenerako apustu ziurrenen artean daude. Kaiku San Miguel Ligako lider sendoa da; bukaerarako bi estropaden faltan, Bizkaitarra ontzikoek eskura dute garaipena matematikoki ziurtatzea.
Urdaibaik, berriz, nabarmen egin du hobera azken asteetan eta Oriori San Miguel Ligako bigarren postua kendu dio. Bermeotarrak izan dira Kaikuren nagusitasuna zalantzan jartzeko gai izan diren bakarrenetarikoak.
Orio ere beti kontuan hartu beharreko aurkaria da. Gipuzkoarrak ez dira denboraldi ona egiten ari, eta ez dago batere argi Kontxan zer maila emango duten. Hala ere, Donostian motibazio berezia izaten dute beti.
Zuzenean, 10:45etatik aurrera
Gizonezkoen estropada 12:00etan hasiko da, eta emakumezkoena, berriz, ordubete lehenago, 11:00etan. ETB-1ek eta eitb.comek bat egingo dute zuzenean Donostiarekin 10:45etatik aurrera, estropada handiaren lehen jardunaldiaren atarian gertatzen den guztiaren berri emateko.
