Arrauna
Azken estropada
TKE Liga: Kaikuk denboraldi paregabea borobildu du Portugaleten
Erredakzioa
Sestaoko ontziak denboraldiko zortzigarren bandera eskuratu du El Corte Ingles Bandera irabazita. Bizkaitarrek lehenbiziko aldiz irabazi dute San Miguel Liga.
Albisteak (2)
Bideoak (1)
Informazio gehiago (1)
Gaurkoarekin zortzi bandera irabazi ditu Kaikuk denboraldi ikusgarria eginda. "Bizkaitarra" ontziak El Corte Ingles Bandera garrantzitsua irabazi du bere zaleen aurrean eta lehendabiziz San Miguel Liga irabazi dute Sestaoko mutilek. Jokatu diren estropada guztietan, Jose Luis Kortaren mutilek erregulartasun paregabea erakutsi dute eta Ligako koroa bereganatu dute.
Portugaleteko estropadan Urdaibaik bigarren postua eskuratu du Kaikuren atzetik. Azken luze ederra jokatu dute bi ontziek ikuskizun polita eskainita. Azken metroetan Sestaokoek gogor estutu dute eta Bandera eskuratu dute. Hirugarren postua Hondarribiak lortu du eta laugarrena San Juanek.
Sailkapen nagusian Kaikuren atzetik Urdaibai gelditu da 170 punturekin. Hirugarren Hondarribiako ontzia gelditu da Bermeoko ontziak baino bi puntu gutxiagorekin. Laugarren San Juan izan da eta bosgarren denboraldiko ezustekoa eman duen Tiran galiziarra. Seigarren eta zazpigarren Pedreña eta Astillero ontzi kantabriarrak izan dira San Pedroren eta Castroren aurretik. Hamargarren postua Zumaiak eskuratu du eta azken bi ontziek, Camargok eta Oriok, maila galdu dute. "Urdaibai auzia" erabaki arte, bi ontziak KAE-1 Ligako klubak izango dira, baina Urdaibaik maila galtzen badu, "Mirotza" ontziak TKE Ligan jarraituko luke.
Estropadako sailkapena:
1 Kaiku Ambilamp 19:27,32 12 puntu
2 Urdaibai Umpro Avia 19:34,08 11
3 Hondarribia Orsa 19:51,64 10
4 San Juan Iberdrola 19:54,72 9
5 Tiran Pereira 20:57,82 8
6 Astillero 21:00,12 7
7 San Pedro Ecolmare 21:00,18 6
8 Pedreña 21:12,20 5
Sailkapen nagusia:
1 Kaiku Ambilamp 186 puntu
2 Urdaibai Umpro Avia 170
3 Hondarribia Orsa 168
4 San Juan Iberdrola 150
5 Tiran Pereira 140
6 Pedreña 138
7 Astillero 137
8 San Pedro Ecolmare 82
9 Castro 65
10 Zumaia Altuna y Uria 56
11 Camargo 46
12 Orio Amenabar 45
