Beste kirolak
Valentzian
Salma Solaun gasteiztarrak brontzezko domina lortu du, Munduko Txapelketako taldekako sailkapen orokorrean
AGENTZIAK | EITB MEDIA
Horrez gain, Basque Team taldeko gimnastaren taldeak zilarra irabazi du bost uztaien finalean eta laugarren izan da pilota eta zinta finalean.
-
Salma Solaun, bost uztaien finalean. Argazkia: EFE
Salma Solaun arabarraren taldeak zilarrezko domina lortu du Valentziako Munduko Gimnasia Erritmikoko bost uztaien finalean, Txina eta Israel nagusi izan diren egunean. 36.100 punturekin amaitu dute ariketa, Txinaren atzetik (urrea, 36.550 puntu) eta Italiaren aurretik (brontzea, 35.850 puntu).
Basque Team taldeko gimnastaren boskotea, halaber, hirugarren geratu da sailkapen orokorrean; horrez gain, pilota eta zinta finalean laugarren sailkatu da. 30.750 puntu lortuta, hirugarren egon dira Israelek ariketa perfektua egin eta urrea eraman duen arte.
2024ko Olinpiar Jokoak, Parisen
Iaztik zuten lortuta 2024ko Olinpiar Jokoetarako txartela; izan ere, 2022an, hiru brontzezko domina lortu zituzten Sofiako Munduko Txapelketan eta zilarrezko bat Tel Aviveko Europako Txapelketan, eta brontzezko beste bat lortu dute aurten, Bakuko Europako Lehiaketan.
