Beste kirolak
PARALINPIAR JOKOAK
Horrelakoa izan da euskal kirolarien jardunaldia irailaren 1ean, igandea
EITB MEDIA
Euskal ordezkariek honako kirol hauetan parte hartu dute larunbat honetan: igeriketa, arrauna, tiroa, gurpildun saskibaloia eta txirrindularitza.
-
Heidi Gaugain. Argazkia: EITB
TXIRRINDULARITZA
Heidi Gaugain lapurtarrak zilarrezko domina eskuratu du C5 3.000 metroko banakako jazarpenean. 3:33.881 denborarekin finalera lehen postuan sailkatu da, bertan Marie Patouillet frantziarraren atzetik geratu da, bi segundogatik, 3:37.723 denborarekin zilarra lortuz.
GURPILDUN SASKIBALOIA
Asier Garcia bilbotarra Herbehereei gailendu zaie Espainiako selekzioarekin (53-68) Paralinpiar Jokoetan jokatutako hirugarren partidan. Galtzen hasi arren, bigarren eta laugarren laurdenetan (13-21 eta 7-19) aurkaria baino askoz gehiago izan dira eta garaipena lortu dute. Garcia bere taldeko jokalaririk saskiratzaileenetakoa izan da, 10 punturekin.
Asier Garcia. Argazkia: Basque Team
Bestalde, Agurtzane Egiluzek, Laura Ugartek, Naiara Rodriguezek eta Bea Zudairek hirugarren porrota jarraian jaso dute Espainiako selekzioarekin, Kanadaren aurka 49-81. Kanadarrak nagusi izan dira, bai jokoan bai markagailuan, partida osoan zehar, batez ere lehen erdian, eta garaipena lortu dute, emaitza mardul batekin.
Bea Zudaire. Argazkia: EFE
IGERIKETA
Nahia Zudaire igerilari gipuzkoarrak ez du dominarik lortu S8 mailako 200 metroetan. Finalerako sailkatu ondoren, Zudaire izan da ibilbidea egiteko tarterik luzeena behar izan duena, 2:54.65eko denborarekin, irabazlearengandik, Brock Whiston britainiarrarengandik, 14 segundo baino gehiagora geratuz.
Nahia Zudaire. Argazkia: Basque Team
ARRAUNA
Baionan bizi den Perle Bouge kirolariak bosgarren amaitu du PR2 scull mistoko A finala. Estropada osoan laugarren izan arren, Benjamin Daviet taldekidearekin batera, postu bat galdu dute azken 500 metroetan, eta 8:47.64ko denborarekin helmugaratu dira.
Perle Bouge. Argazkia: Basque Team
TIROA
Fernando Michelena donostiarrak ezin izan du SH2 motako zutikako 10 metro aire-erriflearen sailkapen-proba mistoko finalerako sailkatu. 633.5eko azken puntuazioarekin, 18. postuan geratu da, zortzigarren sailkatuarengandik ia hiru puntura (636.4).
Fernando Michelena. Argazkia: Basque Team
