Alaves, sailkapeneko lehen postuetara begira

Alaves eta Getafe elkarren aurka arituko dira gaur, 20:00etan, Mendizorrotzan, sailkapeneko goiko postuetara begira.

Gasteizko taldea laugarren postuan dago, hamar punturekin, azken hiru norgehiagokak irabazi ostean. Lehenengo jardunaldian bakarrik galdu zuen, Bartzelonaren aurka. Getafe, berriz, hamargarren dago sailkapenean, gasteiztarrak baino hiru puntu gutxiagorekin, eta Atleticoren kontra porrota jaso ostean atera dira Europako postuetatik.

Babazorroek lau garaipen jarraian lor ditzakete lehenengo aldiz Lehen Mailan daudenetik, larunbatean Vallecasen Rayori erraz irabazi ondoren (1-5).

Abelardoren mutilek ahalik eta azkarren pilatu nahi dute jaitsiera postuetatik urrunduko dituen puntu kopuru handiena, eta, horretarako, etxean sendo agertu nahi dute.

Litekeena da entrenatzaile asturiarrak aldaketak egitea hasierako hamaikakoan bisitarien intentsitateari aurre egiteko. Tartean, azken bi jardunaldietan hiru gol sartu dituen Ibai Gomezek Burguiri utz diezaioke bere lekua.

Getafe, bere aldetik, ez da Alaves bezain gogo-aldarte sendoarekin iritsiko neurketara, ez baitzuen punturik lortu etxean Atletico Madrilen aurka (0-2). Alabaina, Jose Bordalasek entrenatzen duen taldeak etxetik kanpo jokatu zuen azken lehia (Sevillaren aurka, 0-2) erreferentzia gisa erabil dezake hiru puntuak bereganatzen saiatzeko.

Alacanteko entrenatzailearentzat neurketa berezia izango da, berak bueltatu baitzuen Alaves Lehen Mailara. Bordalasek ezingo du Alejo erabili (zigortuta), baina jokatzeko moduan ditu bai Maksimovic bai Markel Bergara. Hartara, Djene defentsako erdialdera itzuliko da, eta baliteke Jaime Matak aurrean jokatzea.

Balizko hamaikakoak:

Alaves: Pacheco; Martín, Maripan, Laguardia, Duarte; Ibai Gomez edota Burgui, Brasanac, Wakaso, Jony; Sobrino eta Calleri.

Getafe: Soria; Damian, Bruno, Djene, Antunes; Portillo, Arambarri, Maksimovic, Amath; Jaime Mata edota Jorge Molina eta Angel.

Epailea: Eduardo Prieto Iglesias.

Futbol-zelaia: Mendizorrotza.

Ordua: 20:00.