Bartzelonari irabazi nahi dio Athleticek, Txapeldunen Ligarako bidean

Athleticek Camp Noun jokatuko du partida irabazi nahi du, Ligako laugarren postuari eutsi eta datorren denboraldian Txapeldunen Liga jokatzeko bidean beste urrats bat emateko.

Malagaren aurka lortutako garaipenaren ondoren, bilbotarrek Ligako itzuli oso bat eman dute laugarren postu horretan, eta argi utzi dute Ligako titulua eskuratzeko borrokan ari diren hiru taldeen atzetik, eurak direla talde indartsuena.

Azken 10 irteeretatik bakarra galdu du Ernesto Valverderen taldeak. Defentsan ondo ari dira, eta Aritz Aduriz momentu oso goxoan da: taldeak egindako azken 13 goletatik bederatzi sartu ditu donostiarrak. Eta denboraldi osoan 15 egin ditu. Hori guztia kontuan izanda, Athletic momentu onean da Bartzelonan irabazteko.

Talde kataluniarra, aldiz, krisian da: Atletico Madrilek Txapeldunen Ligatik kanpo utzi du, Granadan aukera asko galdu ditu Liga irabazteko, eta Errege Kopako finala galdu berri du, Real Madrilen aurka.

Gauzak horrela, 'Tata' Martinoren taldeari denboraldia ahalik eta hoberen amaitzea bakarrik geratzen zaio. Matematikoki oraindik badituzte titulua irabazteko aukera batzuk, baina horretarako geratzen diren bost partidak irabazi beharko lituzkete, eta Real Madrilek eta Atleticok partidaren batean huts egiteari itxaron.

Litekeena da bi taldeek ondorengo hamaikakoak zelairatzea:

Bartzelona: Pinto; Montoya, Bartra, Mascherano, Adriano, Song, Cesc, Iniesta, Alexis, Pedro eta Messi.

Athletic: Iraizoz, De Marcos, San José, Laporte, Balenziaga, Iturraspe, Morán edo Rico, Susaeta, Herrera, Muniain eta Aduriz.

Epailea: Martínez Munuera (valentziarra)

Estadioa: Camp Nou

Ordua: 21:00