San Jose (Athletic- Mallorca): "Gasolina eta ilusioa daukagu"

"Europarako txartela eskuratzeko ilusioa daukagu oraindik. Gai gara helburua lortzeko. Liga amaierari aurre egiteko gasolina nahikoa daukagu". Argi eta garbi mintzatu da Mikel San Jose Athleticek sei onenen artean sailkatzeko dituen aukeren inguruan galdetu diotenean.

Baikor dira jokalariak. Baina, argi dute dagoeneko ezin dutela gehiago huts egin. Europako postuak puntu bira ditu talde bizkaitarrak. Beraz, ezinbestekoa izango da hurrengo aste bietan puntu asko eskuratzea. "Azken jardunaldietan huts egin dugu. Ezin dugu beste akatsik egin. Mallorcaren aurkako partida oso garrantzitsua da".

Gaizka Toquerok ere ez dauka amore emateko asmorik. "Ni baikor naiz. Oraindik puntu asko daude jokoan. Taldea ondo dago. Arlo fisikoan indartsu gaude", esan du aurrelariak.

Europan sartzeko aukera gertu ikusten du Athleticek. Baina, baliteke zuri-gorriak sari barik geratzea. Horregatik, hipotesi guztiak hartu behar dira aintzat. Ez sailkatzea ez litzateke porrota izango Toquerorentzat. "Ez litzateke porrota izango, baina min emango liguke".

Lan saioari dagokionez, Caparrosen hutsunea izan da nabarmenena. Teknikari zuri-gorria Huelvara joan da denboraldi-aurrean erabiliko duten hotela ezagutzera. Luciano Martin bigarren entrenatzaileak hartu du bere lekua. Orbaiz eta Koikili arazo fisikoekin daude.