Athletic Club
Asteazkenean, 19:30ean
Athleticek ezustekoa eman nahi du Valentziaren aurka
Erredakzioa
Talde zuri-gorriak San Mamesen jokatuko du asteazkenean, 19:30ean. Balenziaga eta Rico baja dira.
Athleticek Valentzia izango du aurkari asteazken honetan, 19:30ean, San Mamesen. Zaleak haserre daude taldearekin denboraldi honetan eskaintzen ari diren joko kaskarrarengatik eta igandean Ziganda entrenatzaileari kargua uzteko eskatu zien zaleek.
Iragan ostegunean, Europa Ligako final-zortzirenetarako sailkatu zen talde zuri-gorria eta igandean garaipena lortu zuen Malagaren aurka. Spartak Moskuren aurka 1-2 galdu zuen Athleticek ostegunean, baina aurrera egin zuen. Ondoren, igandean, Malagari 2-1 irabazi zion, galtzen hasi ostean eta Kepa Arrizabalagak penalti bat geratu zuen.
kontuak kontu, Zigandak aldaketak egingo ditu igandeko hamaikakoarekin alderatuta. Iñaki Williamsek hasieratik jokatuko du Susaetaren ordez eta Enric Saboritek jokatuko du defentsako ezker hegalean, Lekueren ordez. Ander Iturraspe hasierako hamaikakora itzul daiteke, eta Unai Nuñezek hasieratik jokatuko du deialditik kanpo geratu den Yeray Alvarezek (arazo fisikoren bat dauka) atsedena har dezan. Zigandak, Balenziaga, Rico eta Muniain jokalarien bajak izango ditu.
Bestalde, Valentzia baikor joango da San Mamesera. Laugarren postuan dago talde valentziarra eta denboraldi ona egiten ari da. Datorren denboraldiko Txapeldunen Ligara sailkatzea du helburu Valentziak. Marcelino Garcia Toral entrenatzaileak ere aldaketak egingo ditu azken partidarekin alderatuta. Garay eta Pereira dira Valentziaren baja bakarrak. Jayson Murillo edo Gabriel Paulista erdiko defentsek atsedena hartuko dute, eta Ruben Vezo sartuko da hamaikakoan. Kondogbia jokatzeko prest izango du Marcelinok, aste batzuk bajan eman ostean. Aurrealdean ere zalantzak ditu entrenatzaile asturiarrak; Luciano Viettok edo Zazak hasierako hamaikakoan sartzeko aukerak dituzte Rodrigoren edo Santi Minaren ordez.
Ustezko hamaikakoak:
Athletic: Kepa; De Marcos, Unai Nuñez, Iñigo Martinez, Saborit; Williams, San Jose, Beñat, Cordoba; Raul Garcia eta Aduriz.
Valentzia: Neto, Montoya, Vezo edo Murillo, Gabriel Paulista, Gaya; Coquelin, Parejo, Carlos Soler, Guedes; Vietto edo Rodrigo eta Santi Mina.
Epailea: Gil Manzano.
Zelaia: San Mames.
Ordua: 19:30ean.
