Itxi

Athletic Club

FINAL-ZORTZIRENAK

Athleticek San Mameseko magia berreskuratu behar du Olympique Marseilla kanporatzeko

AGENTZIAK | ERREDAKZIOA

Joaneko partidan Adurizek penalti bidez egindako golak hurrengo kanporaketara igarotzeko itxaropenei eustea ahalbidetzen die zuri-gorriei.

  • Adurizek penaltiz egin zuen Athleticen gol bakarra joanekoan. Argazkia: EFE

    Adurizek penaltiz egin zuen Athleticen gol bakarra joanekoan. Argazkia: EFE

Athleticek bere alderdirik onena erakutsi beharko du ostegun honetan (19:00) eta San Mamesek izan ohi duen magiarekin bat egin, baldin eta joan zen astean Olympique Marseillaren aurka jaso zuen porrotari (3-1) buelta eman nahi badio, Europa Ligako final-zortzirenetan.

Zigandaren taldea bizirik heldu da itzuliko partidara, Frantzian ahazteko moduko norgehiagoka egin arren. Adurizek penalti bidez egindako golak hurrengo kanporaketara igarotzeko itxaropenei eustea ahalbidetzen die zuri-gorriei.

'Lehoiek' bere ezizenaren ordezkari leialak izan beharko dute, itxura guztien arabera huts egingo ez duen San Mames zelaian. Horrenbestez, gaurik onenetako giroa egongo dela espero da. Alabaina, kanporaketa iraultzekotan, talde bilbotarrak batez ere behar duena da bere izatea eta futbola berreskuratzea, denboraldian zehar apenas gertatu ez bezala.

Zuri-gorriek hasieratik bertatik ekingo diote 1-0ekoa bilatzeari, hala adierazi dute aldagelatik Aduriz buru dutela.

Aurtengo etxeko emaitzak, ordea, ez dira guztiz itxaropentsuak. Bost garaipen lortu dituzte Ligan San Mamesen jokatutako 14 norgehiagoketan, eta ez dira izan oso agerraldi sendoak. Europako lehiaketan ere abuztuan Dinamo Bukaresten aurka lortuta 3-0ekoa da eskuratutako emaitzarik aipagarriena.

Dena dela, igandean Leganesi 2-0 irabazi eta gero (emaitza horrek balio izango lioke), Athletic animoz bete da, baina adi egon beharko du atzealdean, Marseillak erakutsi baitzuen joanekoan erasoko jokalari zorrotzak dituela.

Zigandak atseden eman zio Adurizi azken jardunaldian, eta bihar bere golak noiz iritsiko zain egongo dira zelaira bertaratuko diren zaleak. Dagoeneko 26 pilatu ditu lehiaketa horretan, eta golik gehien dituen Radamel Falcaorengandik lau golera besterik ez dago.

Gipuzkoarrak, baina, ez du bere aldamenean izango ohikoa duen Raul Garcia bere kidea, ezta Mikel San Jose ere, bata zein bestea zigortuta daudelako.

Williamsek edota De Marcos balioaniztun bete dezakete Atletico Madrileko jokalari ohiaren lekua. Hegaletatik sakontasuna emateko Susaeta eta Cordoba aritu daitezke. Zelai-erdian, Mikel Rico jokatzeko gertu badago ere, Beñat eta Iturraspe hasieratik ekingo diotela dirudi. Atzealdeari dagokionez, itxura guztien arabera, Saborit ezker hegalera bueltatuko da (Balenziaga deialditik kanpo geratu baita), eta Yeray Alvarez, Etxeita eta Unai Nuñez erdiko atzelari gisa aritzeko bi postuetako bat lortzeko borrokatuko dira. Zigandak jakitera emandako 19 jokalariz osatutako deialdiko berritasunik nagusiena Peru Nolaskoain gaztea bertan sartu duela da, baita Kike Sola ere.

Bere aldetik, Toulouse taldeari (1-2) irabazi ostean helduko da Marseilla partidara, Ligue 1 txapelketan hirugarren postuan dagoela eta kanporaketan duen abantailari eusteko asmoz. Estutasunik ez izateko, bisitari gisa izan ohi duen aurpegia hobetu beharko dute frantziarrek, galdu egin baititu kanpoan jokatu dituen azken lau neurketatik hiru; hala ere, aurten inork ez dio gol bat baino gehiago egin.

Rudi Garciak zuzentzen duen taldearentzat albisterik onena hauxe izan da: Florian Thauvin erasoko ezker hegalekoa jokatzeko moduan izango dela (joanekoan lesionatu egin zen eta ordezkatu egin behar izan zuten). Ez zuen Ligako partidan jardun norgehiagoka honi begira, baina litekeena da hasieratik ez zelairatzea bere entrenatzaileak. Horrenbestez, Payet, bolada onean dagoen Lucas Ocampos eta lesio batetik itzuli berria den Mitroglou aurrelari greziarra izatea Marseillakoen erasoan aritzea hastapenetik.

Balizko hamaikakoak

Athletic: Iago Herrerin; De Marcos, Yeray, Etxeita, Saborit; Iturraspe, Beñat; Williams, Susaeta, Cordoba; Aduriz.

Olympique Marseilla: Mandanda; Sakai, Rami, Rolando, Amavi; Anguissa, Sanson edo Luiz Gustavo; Lopez, Payet, Ocampos; Mitroglou.

Epailea: Anthony Taylor (Ingalaterra).

Futbol-zelaia: San Mames.

Ordua: 19:00