Itxi

Athletic Club

3. JARDUNALDIA

Athleticek irabazi egin du Eibarren aurkako euskal derbia

AGENTZIAK / ERREDAKZIOA

Unai Lopezen bi golek denboraldiko lehen hiru puntuak eman dizkiete zuri-gorriei; Eibarrek, berriz, partidarik irabazi gabe jarraitzen du.

  • Athletic, Unai Lopezen lehen gola ospatzen. Argazkia: EFE

    Athletic, Unai Lopezen lehen gola ospatzen. Argazkia: EFE

Athleticek 1-2 irabazi dio Eibarri igande honetan Ipuruan jokatu den euskal derbian, Santander Ligako hirugarren jardunaldian. Zuri-gorrien bi golak Unai Lopezek egin ditu; etxeko taldearen gola, berriz, Kike Garciarena izan da, denboraldiko bigarrena. Gol horrek behin-behineko berdinketa ekarri du lehiara, baina bilbotarrek gola egin dute berriro, hiru puntuak eman dizkiena.

VAR sistemak protagonismo handia izan du neurketa osoan zehar, hainbat aldiz esku hartu baitu. Horren erakusgarri da zuri-gorriek hiru gol egin dituztela, baina batek ez du balio izan Villalibre jokoz kanpo zegoelako Iñaki Williamsi goleko erdiraketa egin dionean. Beste bi golek ere teknologiaren galbahetik igaro behar izan dute, epaileak oniritzia eman aurretik, eta horrek asko moteldu du derbiaren erritmoa.

Horrez gain, Cordero Vega epaileak beste behin gelditu behar izan du partida, Diopek Cordobari izterra nahita ala nahi gabe zapaldu dion erabakitzeko. Azkenerako, txartel horia ikusi du Eibar taldeko senegaldarrak jokaldi horregatik.

Horrenbestez, Gaizka Garitanoren taldeak denboraldiko lehen hiru puntuak lortu ditu, bi partida jokatu dituenean, Bartzelonaren aurkako bigarren jardunaldiko norgehiagoka urtarrilera arte atzeratu baita. Bestalde, Jose Luis Mendilibarrek zuzentzen duen taldeak puntu bakarrarekin jarraitzen du sailkapenean.

Fitxa teknikoa:

1- Eibar: Dmitrovic; Correa (Tejero, 71. min), Paulo Oliveira, Bigas, Kevin Rodrigues; Diop, Recio (Quique González, 46. min), Expósito; Kadzior (Pedro León, 46. min), Inui, (Arbilla, 84. min) eta Kike García (Muto, 90. min).

2 - Athletic: Unai Simón; Capa, Núñez, Iñigo Martínez, Yuri; Unai López (Vesga, 93. min), Dani García, Williams (Córdoba, 85. min); Muniain (Sancet, 85. min), Morcillo (Villalibre, 58. min) eta Raúl García.

Golak: 0-1, 40. min, Unai López; 1-1, 48. min, Kike García; 1-2, 87. min, Unai López.

Epailea: Cordero Vega. Txartel horiak: Pape Diop (Eibar) eta Gaizka Garitano (Athletic).