Athletic-Osasuna (3-1): 'Lehoiek' aise irabazi dute bigarren derbia

Erredakzioa

Azken eguneratzea: 2011/10/18 11:33 (UTC+2)

Muniain, Gabilondo eta Javi Martinez izan dira Athleticen golegileak, denak lehen zatian. Osasuna ezinean aritu da, eta Nekounamek neurketaren azken minutuan egin du gorritxoen gola, penaltiz.

Muniainen gola ospatzen. Argazkia: EFE.

Whatsapp
Whatsapp
telegram
twitt
Bidali
Esteka kopiatu

Athleticek derbiko hiru puntuak etxean utzi nahi zituen, baina, baina Osasunak ez dizkio gauzak erraz jarri, batez ere lehen zatian. Gorritxoak behin baino gehiagotan heldu dira Iraizozen atera (Ninok eta Nekounamek, esaterako, aukera nahiko garbiak izan dituzte), baina jokoaren kontrola eta baloiaren jabetza zuri-gorriena izan da.

Muniainek 'lehoiak' aurreratu ditu 29. minutuan. Susaetak hasi du jokaldia eskuin hegaletik, Llorentek erdiraketa bikaina egin dio nafarrari eta Muniainek ez du hutsik egin penalti puntutik. Minutu batzuk geroago, bigarrena heldu da. Llorentek buruz area txikiaren barruan erdiratu du eta Gabilondok gola igo du markagailura.

Llorentek ez du golik egin, baina lehen bi golak lortzeko giltzarria izan da. Hirugarrena lehen zatiko azken minutuan heldu da. Iraolaren pase dotore bat buruz errematatu du Javi Martinezek eta baloia sarera bidali du. 'Lehoiek' etxeko lanak atsedenaldia heldu baino lehen egin dituzte

Bigarren zatia gorabeherarik gabe joan da zuri-gorrientzat. Iker Muniain, Igor Gabilondo eta Javi Martinezen golei esker, Athletic lasai aritu da zelaian. Gainera, epaileak Lama kaleratu du 69. minutuan, bigarren horia erakutsi ondoren. Osasuna jokalari bat gutxiagorekin geratu da, baina, hala ere, saiatu egin da eta azkenean gola egin du. Javad Nekoumanek nafarren gola sartu du penaltiz, Javi Martinezek baloia eskuarekin ukitu ostean.

Athleticek hiru gol sartu baditu ere, jokalaririk onena Gorka Iraizoz izan da. Atezainak hainbat geldialdi egin ditu eta baten baino gehiagotan bere areatik irten da gorritxoen erasoaldiak gelditzeko. Zuri-gorriek arazo gabe gainditu dute Osasuna, eta derbiaren hiru puntuak lortu dituzte. Datorren ostegunean, Europara begira jarriko dira, Salzburgoren aurka arituko baitira Bielsaren mutilak.

3 - Athletic: Iraizoz; Iraola, Ekiza, Amorebieta, De Marcos (Aurtenetxe, 46'); Javi Martinez; Susaeta (Susaeta, 79'), Iturraspe, Muniain (Toquero, 75'), Gabilondo; eta Llorente.

1 - Osasuna: Andres Fernández; Marc Bertrán, Roversio (Roversio, 40'), Damia; Puñal, Nekounam; Cejudo (Ibrahima, 62'), Raul Garcia, Lamah; eta Nino (Annunziata, 74').

Golak: 1-0, 29': Muniain. 2-0, 37': Gabilondo. 3-0, 46+': Javi Martínez. 3-1, 90': Nekounam, penaltiz.

Epailea: Estrada Fernandez. Lamah kanporatu du 69. minutuan bigarren horia erakutsiondoren. Txartel horia erakutsi die baita ere Iraola eta Javi Martinezi Athleticen eta Nekounami.