Ekizaren parte-hartzea zalantzan, Sevillaren kontra

Ez dago argi oraindik Borja Ekiza igandean Sevillaren aurkako partidan aritzeko moduan izango den, gaur ere aparte entrenatu baita. Saio berean, Marcelo Bielsak zentral moduan jarri du Javi Martinez eta titularren taldean sartu du Iñigo Perez.

Ekizaren zalantzaz gain, Fernando Amorebieta eta Ander Iturraspe ez dira jokatzeko moduan egongo, zigortuta daudelako. Hori dela eta, Rosarioko entrenatzaileak aldaketak egin beharko ditu hamaikako sendo bat osatzeko.

Bestalde, Fernando Llorentek ezin izan zuen Espainiako selekzioarekin jokatu, belauna minduta duelako. Ikusteko dago erabat sendatzen den, baina partida horretarako osatu ezean, Toquerok hartuko du haren postua.