Athletic Club
Primera Iberdrola Liga
Athleticen eta Bartzelonaren arteko neurketa, atzeratuta positibo batengatik
A. B. | EITB Media
Talde zuri-gorriko jokalari batek positibo eman du covid-19an, eta Espainiako Futbol Federazioak ostegunean jokatzekoa zen Primera Iberdola Ligako 17. jardunaldiko neurketa atzeratzea erabaki du.
-
Primera Iberdrola Ligako Athletic Club - Levante partidako irudia. Argazkia: EITB Media
Ostegunean Primera Iberdrola Ligako 17. jardunaldian Athleticek eta Bartzelonak jokatu behar zuten partida atzeratzea erabaki du Espainiako Futbol Federazioak, talde zuri-gorriko jokalari batek positibo eman baitu covid-19a atzemateko proban, Athleticek jakinarazi duenez.
Osasun-protokoloari jarraituz, horren berri eman dio klubak Osakidetzari. "Osasun agintariek adierazi dutenez, lehen taldeko 10 langilek koarentenan egon beharko dute, positiboaren kontaktu estu gisa. Kaltetuek etxean isolatuta egon beharko dute, edozein sintoma edo intzidentziaren berri emanez. Kontaktu estua ez duten gainerako jokalariek Lezamako instalazioetan entrenatzen jarraituko dute, Iraia Iturregiren aginduetara", iragarri du Athleticek.
Espainiako Futbol Federazioari ere eman dio horren berri Bilboko klubak, eta Lehiaketa Batzordeko epaileak erabaki du neurketa atzeratzea, data zehaztu gabe. Ahal den neurrian, norgehiagoka hau jokatzeko data ahalik eta azkarren bilatzea du helburu Espainiako Futbol Federazioak.
