Eibarrek jaitsieratik aldentzea du helburu, eta Realak Championseko postuetan sartzea

Eibarrek eta Realak gaur jokatuko dute Ligako 24. jardunaldian atzeratu zen euskal derbia, Ipuruan, 20:00etan. Armaginek jaitsiera postuetatik aldentzea dute helburu; Reala, aldiz, Txapeldunen Ligako postuetan sartuko da garaipena lortuz gero.

Kolpe latza hartu zuen Eibarrek, larunbatean Mallorcaren aurka galduta. Orain, jaitsiera postuan dagoen Baleareetako taldea bi puntura du. Neurketa aurreikusita zegoen 24. jardunaldian jokatu izan balitz, armaginek jaitsierarekiko sei puntuko aldea izango zuketen.

Jose Luis Mendilibar entrenatzaileak aldaketak egingo ditu Mallorcaren aurkako hamaikakoarekin alderatuta. Paulo Oliveirak ezingo du jokatu, zigortuta baitago. Zelai erdian zalantza asko ditu talde armaginak, eta Inuik eta Quique Gonzalezek hamaikakoan sartzeko aukerak dituzte.

Reala, aldiz, Txapeldunen Ligako postuetan sartzeko aukeraren aurrean dago. Talde txuri-urdinak galdu egin zuen Bartzelonaren aurka larunbatean, baina asteazkenean Errege Kopako finalera sailkatzea lortu zuen, Mirandesi irabazita. Imanol Alguacil entrenatzaileak aldaketak egin zituen Barçaren aurkako neurketan; adibidez, aulkian utzi zuen Mikel Oyarzabal. Bere jaioterrian, aldiz, hasieratik jokatuko du eibartarrak. Januzajek ere hasierako hamaikakoan sartzeko aukerak ditu.

Etxetik kanpo partida gehien irabazi dituen (5 garaipen) taldeen artean dago Reala, baina Reale Arenatik kanpo jokatu dituen azken hiru partidetan, Betisen, Leganesen eta Bartzelonaren aurka, ez du garaipenik erdietsi.

Ustezko hamaikakoak:

Eibar: Dmitrovic; Cote, Bigas, Burgos, Arbilla; Orellana, Exposito, Escalante, Quique Gonzalez, Inui; Charles.

Reala: Remiro; Gorosabel, Diego Llorente, Le Normand, Monreal; Zubeldia, Merino, Odegaard; Oyarzabal, Isak, Januzaj.

Epailea: Medie Jimenez.

Zelaia: Ipurua.

Ordua: 20:00etan.