Osasunak Real Madrili egingo dio bisita Cristianoren itzuleran

Osasuna Real Madrilen aurka arituko da Santiago Bernabeun. Larunbatean 16:00etan izango da denboraldiko partida gogorrenetariko bat. Europako txapelduna Cristiano Ronaldoren itzuleraren egunean bisitatuko dute.

Enrique Martinek hiru baja ditu: Javier Flaño, Realaren aurka lesionatuta, Goran Causic eta Didier Digard. 20 jokalari deitu ditu, hau da, jokatzeko moduan dauden guztiak, Alex Berenger, Antonio Otegui eta Javi Alamo heldu berria kenduta.

Emmanuel Riviere, fitxaketa merkatua bukatzear zegoenean heldu zena, lehenengo aldiz sartu da denboraldian, eta lesionatuta zegoen Juan Fuentes berreskuratuko du Martin Monrealek.

Osasunaren hamaikakoa oraindik ezezaguna da, Enrique Martinez ez baitu pistarik eman, eta aldaketak sar ditzake. Aurrelari batekin ala birekin jokatzeko aukera dago.

Real Madrilen, albistea Cristiano Ronaldoren itzulera izango da. Portugaldarra Eurokopako finalean lesionatu zen, Frantziaren aurkako garaipenean. Denboraldian lehenengo aldiz agertuko da, ohi duen golak sartzeko gosearekin.

Zinedine Zindanek Alvaro Morata jarriko du aurrean, Cristianok eta Gareth Balek lagunduta. Benzemak ere minutuak izatea espero da.

Keylor Navas, Fabio Coentrao eta Isco Alarcon lesionatuta daude oraindik, eta gainera Real Madrileko entrenatzaileak deialditik kanpo utzi ditu Marcelo, Casemiro eta James Rodriguez, selekzioekin jokatutako partidetatik nekatuta iritsi omen direlako.

USTEZKO HAMAIKOAK

Real Madril: Casilla; Carvajal edo Danilo, Pepe, Sergio Ramos, Nacho; Kroos, Kovacic, Modric; Bale, Cristiano Ronaldo, Morata.

Osasuna: Nauzet; Tano, David Garcia, Miguel Flaño, Unai García, Fuentes; Fausto Tienza, Oier, Fran Merida, De las Cuevas; Riviere.