Osasuna-Deportivo (0-0): Puntu-banaketa

Jaitsiera-postuak saihesteko aurkari zuzenak diren Osasunak eta Deportivok berdindu egin dute Reyno de Navarran, golik gabeko neurketan. Talde nafarrak aurkariak baino gehiago arriskatu du; bisitariak, puntuarekin konforme agertu dira.

Mendilibar eta Lotina entrenatzaile bizkaitarren arteko demak aukera gutxi izan ditu. Argienak Osasunarentzat izan dira eta onena bost minuturen faltan heldu da, zutoinean jo duen baloi batekin. Riazorren joanekoan, golik gabe berdindu zuten ere Deporrek eta Osasunak.

Mendilibarrek neguko merkatuan fitxatutako Cejudo sartu du hamaikakoan ustekabean. Andaluziarrak lehenengo zati ona egin du, Osasunak jokoaren zama eraman duen tartean.

Gorritxoak partida hasiera on baten protagonista izan dira, hiru erremate egin dituzte aurreneko hamaika minutuetan. Cejudok eta Masoudek ez dute atea aurkitu eta Aranzubiak Lekicen jaurtiketa gelditu du.

Osasunak baloiaren jabetza hartu du, baina ezin izan du aukera gehiago egin. Galiziarrek partidaren erritmoa moteltzen jarri dituzte bere indar gehienak.

Lotinaren taldea ez da erasoan agertu lehenengo zatian. Guardado saiatu da urrutitik baina gora joan zaio jaurtiketa; eta Sandek jaurtiketa makala egin du, Ricardok erraz gelditu duena.

Bigarren zatia, baina gidoi bera. Etxekoek egin dituzte proposamenak eta Depor atzean babestu da kontraerasora irteteko asmoarekin.

Osasuna jaun eta jabe izan bada ere, Mendilibarren jokalariak galiziarren amaraunean galdu egin dira. Osasunaren jokalari garrantzitsuek ez dute egun ona izan.

Aranzubiak desbideratutako jaurtiketa bat eta Kike Solak azken minutuetan zutoinera bidalitako baloi bat Osasunaren alde jarri ahal izan dute partida. Deportivo, azken txanpan, Rikiren kontraeraso birekin saiatu da, baina markagailuak 0-0ekoa erakusten amaitu du neurketa.

Fitxa teknikoa:

0 - Osasuna: Ricardo; Nelson, Lolo, Sergio, Monreal; Puñal, Nekounam; Cejudo (Soriano, m.60), Camuñas, Masoud (Coro, m.38); eta Lekic (Kike Sola, m.79).

0 - Deportivo: Aranzubia; Laure, Lopo, Colotto, Morel; Juan Rodríguez, Antonio Tomás; Adrián (Lassad, m.86), Míchel, Guardado (Pablo Álvarez, m.55); eta Sand (Riki, m.64).