Deportivok Oltra kargutik kendu eta Domingos Paciencia fitxatu du

Jose Luis Oltra entrenatzailea kargutik kendu du Augusto Cesar Lendoiro Deportivoko presidenteak. Erabakia entrenatzailearekin bildu ostean iragarri du Lendoirok. Era berean, Domingos Paciencia entrenatzaile portugaldarra Oltraren ordezkoa izango dela adierazi du Deportivoko presidenteak.

Iragan denboraldian Galiziako taldea lehen mailara igotzea lortu zuen Oltrak. "Nahiz eta une oso goxoak bizi erabakia hartu beharra zegoen. Egindako guztia eskertu nahi diot, baina egoerak agintzen du eta taldeari buelta ematea zaila zela ulertu dugu klubean", esan du Lendoirok.

Valentziako entrenatzaileak bi garaipen baino ez ditu lortu denboraldi honetan eta emaitza txarrek Lendoiro presidentearen erabakia bizkortu dute.

Ondoren Domingos Pacienciaren fitxaketa azaldu du Lendoirok. "Xehetasun batzuk falta dira", baina Paciencia izango da entrenatzaile berria denboraldia amaitu arte, adierazi du agintariak.