Futbola
Aldaketa
Azkargortak Bolivar taldea entrenatuko du, Boliviako selekzioa utzita
Erredakzioa
Asteazkenean egingo du debut ofiziala talde berriarekin, Rio de Janeiroko Maracana estadio ospetsuan, Flamengoren aurka, kluben arteko nazioarteko txapelketan.
-
Xabier Azkargorta, Boliviako selekzioarekin. Efe.
Xabier Azkargortak Bolivar taldeko zuzendaritza teknikoaz arduratuko da astelehenetik aurrera, Marcelo Claure klubeko presidenteak aditzera emandakoaren arabera.
"Ligan eta Libertadores Kopan izandako hasiera kaskarraren ondorioz, talde teknikoa sendotzeko erabakia hartu dut. Bihartik aurrera, Xabier Azkargortak hartuko du zuzendaritza teknikoaren ardura eta Vladimir Soriak alboko zuzendari tekniko eta laguntzaile tekniko lanak egingo ditu", esan du Claurek Twitterren.
Soriak larunbatean zuzendu zuen azken partida; orduan Bolivarrek 3 eta 0 irabazi zion Aurorari, aurreko partidetan porrot ugari jaso ostean.
Azkargortak asteazkenean egingo du debut ofiziala talde berriarekin, Rio de Janeiroko Maracana estadio ospetsuan, Flamengoren aurka, kluben arteko nazioarteko txapelketan.
