Reala
Larunbatean, 22:00etan
Realak garaipen bakarra behar du Europan jokatzea ziurtatzeko
Erredakzioa
Donostiarrek Betisi egingo diote bisita larunbatean. Iñigo Martinez eta Antoine Griezmann izango dira nobedade nagusiak Arrasateren hamaikakoan.
Realak Benito Villamarinen jokatuko du larunbatean, Europako Liga jokatzeko postuei sendo eusteko helburuarekin. Horretarako Betisi gailendu beharko zaio. Sevillako taldea sailkapeneko azken postuan da eta jaitsiera noiz gauzatuko den jakitearen zain daude soilik.
Donostiarrek garaipen bakarra behar dute zazpigarren postua bermatzeko, baina gorago amaitu nahi dute denboraldia eta muga egun duten seigarren postutik gora ere jarri dute. Gauzak horrela, begiak Sevillaren bosgarren postuan jarrita dituzte, are gehiago Unai Emeryren taldeak donostiarrek baino egutegi zailagoa duela jakinda.
Txuri-urdinak talde biguna izaten ari dira 2014.ean Anoetatik kanpo, eta Benito Villamarinen bigarren garaipena jarraian erdietsi nahi dute. Otsailaren 22an lortu zuten hori lehen aldiz.
Jagoba Arrasatek baja garrantzitsua du, Ruben Pardoren, hain zuzen, zigortuta dagoelako. Horrek Esteban Graneroren berragerpena ekarri dezake, zortzi hilabete belaunean min hartuta eman ondoren.
Xabi Prieto kapitaina izan daikete beste nobedadeetako bat, hiru astetan lesionatuta egon ondoren. Hala ere, baliteke oraindik sasoiko ez egotea eta partida aulkian hastea.
Hasierako hamaikakoan bi nobedade nagusi espero dira: Iñigo Martinez eta Antoine Griezmann. Frantziarrak zigorra bete zuen pasan jardunaldian eta larunbatean Velarekin batera jokatzeko moduan izango da Realaren erasoan. Biek 29 gol egin dituzte aurtengo denboraldian.
Litekeena da bi taldeek ondorengo hamaikakoak zelairatzea:
Betis: Adán; Chica, Perquis, Jordi Figueras, Nacho; Juanfran, N'Diaye, Lolo Reyes edo Verdú, Juan Carlos; Jorge Molina eta Rubén Castro.
Reala: Bravo; Zaldua, Iñigo Martínez, Mikel, De la Bella; Bergara, Zurutuza, Canales; Griezmann, Vela eta Agirretxe.
Epailea: Miguel Ángel Ayza Gámez (Valentziarra).
Estadioa: Benito Villamarín.
Ordua: 22.00
