Bartzelonak eta Atletico Madrilek bolada onari eutsi nahi diote

Bartzelonak eta Atletico Madrilek Txapeldunen Ligako partidak jokatuko dituzte astearte honetan, eta porrotik jaso gabe jarraitzea dute helburu bi taldeek.

Atleticok eta Barçak Espainiako Superkopa jokatu zuten abuztuan, eta bi partidak berdinduta geratu ziren. Calderonen jokatu zen joaneko partidan, bana (1-1) berdindu zuten, eta Camp Noun jokatutako itzulerako partida golik gabe bukatu zen (0-0). Bartzelonak lortu zuen titulua, berdinketa kasuan etxetik kanpo sartutako golen balio bikoitzagatik. Bi talde hauek orain arte BBVA Ligan jokatu dituzten zazpi partidak irabazi egin dituzte, eta Txapeldunen Ligako lehen jardunaldian ere, garaipena lortu zuten.

Barçak Celticen aurka jokatuko du astearte honetan, Glasgown. Talde katalanak Messiren baja izango du partida honetarako, baina garaipena lortzeko faboritoa da. Celticek porrota jaso zuen Milanen aurka lehen jardunaldian, eta ezustekoa ematen saiatuko da. H multzoko beste partidan, Ajaxek Milan izango du aurkari Amsterdam Arenan.

Atletico Madrilek aurkari gogorra izango du astearte honetan. Portoren aurka jokatuko dute Portugalen. Bi taldeek garaipena lortu zuten lehen jardunaldian. Simeonek zuzentzen duen taldea indar betean iritsiko da larunbatean Real Madrili derbia irabazi ostean, baina Diego Costaren baja izango du, zigortuta baitago. Porto talde sendoa da, eta bi taldeek lehia estua izango dutela dirudi. Zenit-Austria Wien izango da G multzoko bigarren jardunaldiko beste partida.

Astearte honetan E eta F multzoko partidak ere jokatuko dira. F multzoko partidak oso interesgarriak izango dira: Arsenal-Napoli eta Borussia Dortmund-Olympique Marselle. E multzoko bigarren jardunaldiko partidak hauek izango dira: Steaua-Chelsea eta Basel-Schalke 04.