Itxi

Txapeldunen Liga

3. jardunaldia

Sevillak eta Barçak uste baino gehiago sufrituta lortu dituzte garaipenak

Erredakzioa

Bartzelonak irabazi dio Dinamo Kievi (2-1) eta Sevillak mendean hartu du Krasnodar. Manchester Unitedek porrota jaso du Istanbulen aurka (2-1) eta PSGk galdu egin du Leipzigen kontra (2-1).

  • En-Nesyri

    En-Nesyri, Sevillarekin Krasnodarri sartu dion gola ospatzen. Argazkia: EFE

Txapeldunen Ligak gainditu du jada multzoen faseko hirugarren jardunaldia, asteazken honetan E, F, G eta H multzoetako taldeek jokatu dituzten partidekin. Ezusteko emaitza batzuk eman dira.

Bartzelonak garaipena lortu du Dinamo Kieven aurka (2-1) uste baino gehiago sufrituta; Ter Stegen Barçako atezainak eragotzi du talde ukrainarraren garaipena, partida bikaina eginda. G multzoko partidan, Juventusek mendean hartu du Ferencvaros (1-4). Barça da liderra 9 punturekin, Juventus bigarren 6 punturekin eta puntu bana dute Dinamo Kievek (hirugarren) eta Ferencvarosek (laugarren).

Bestalde, Sevillak irabazi egin du Krasnodarren kontra (3-2) jokatu duen neurketa, bi goleko desabantailari buelta emanda. Chelsea aise nagusitu da Rennesen aurka (3-0). Ondorioz, Chelsea (7 puntu) da E multzoko liderra, bigarren den Sevillarekin (7 puntu) berdinduta. Krasnodar (puntu 1) da hirugarren eta Rennes (puntu 1) laugarren.

F multzoan Borussia Dortmundek irabazi egin du Brugge taldearen aurka (0-3) eta Zenit-Lazio norgehiagoka bana berdinduta (1-1) amaitu da. Borussia Dortmund (6 puntu) da liderra, Lazio (5 puntu) bigarren, hirugarren taldean da Brugge (4 puntu) eta Zenit (puntu 1) azkena da.

Eguneko ezustekoak H multzoan eman dira. Manchester Unitedek galdu egin du Istanbul Basaksehirren aurka (2-1) eta PSGk porrota jaso du Leipzigen eskutik (2-1). Gauzak horrela, multzoa estutu egin da: Manchester United (6 puntu) da lehen postuan, bigarren den Leipzigekin (6 puntu) berdinduta. PSG (3 puntu) hirugarren da, eta laugarren postua betetzen du Istanbul Basaksehirrek (3 puntu).