Pilota
Erremontea
Ansa II.ak hirugarren urtez jarraian irabazi du erremonteko buruz buruko txapelketa
EITB Media
Imanol Ansak 30-20ko emaitzarekin lortu du garaipena Xabier Azpirozen aurka buruz buruko finalean, eta hirugarrenez jantzi du txapela.
Imanol Ansa da erremonteko buruz buruko txapelduna larunbat honetan (otsailak 8) finalean Xabier Azpiroz 30-20ko emaitzarekin garaitu baitu. Ikuskizu bikaina eskaini dute.
Parekotasuna izan da nagusi hasieran, eta bi jokalariei kosta egin zaie markagailuan zuloa zabaltzea (1-1, 2-2). Binakako berdinketaren ostean, Ansak 8 tantoko errenta lortu du (3-2, 4-2, 5-2, 5-2, 7-2, 8-2, 9-2, 10-2), sakearekin min handia egin baitio Urnietako erremontariak Azpirozi.
Sakea bereganatu ostean, Azpirorek aldea murriztu du (10-3), baina Ansak ez du barkatu, eta gipuzkoarrarentzat izan da 11. tantoa (10-3, 11-3); izan ere, Ansa II.ak koska bat gorago dagoela erakutsi du partida aurrera egin ahala, eta nafarrak oso deseroso jokatu du (12-4, 13-4).
Azpirozek sakea baliatu du Ansarengana markagailuan gerturatzeko (13-5, 13-6), baina Urnietako pilotariaren nagusitasuna erabatekoa izan da (14-6, 15-6).
Bigarren zatiaren hasieran, Azpiroz ezinean aritu da, eta Ansa erraztasun ikaragarriarekin aritu da (16-6). Hala ere, egoerari buelta eman nahian, Azpirozek bost tanto jarraian egin ditu (16-7, 16-8, 16-9, 16-10, 16-11).
Une erabakigarrian, baina, Imanol Ansak erantzuten jakin du (17-11), eta beste bi tanto egin ditu sakea eskuratu ondoren (18-11, 19-11). Uitziko pilotaria tartea txikitzen ahalegindu da (19-12, 19-13), baina ez du aurkariaren bolada ona eteterik lortu (20-13, 21-13, 22-13, 23-13).
Bolada onari berriro helduta, Azpirozek 3 tanto jarraian egin ditu (23-14, 23-15, 23-16), baina Ansak egin du hurrengoa (24-16). Hala ere, Azpirozek ez du etsi, eta 3 tanto jarraian egin ditu berriro (24-17, 24-18, 24-19).
Sakea bereganatu ostean, gipuzkoarrak min egiten jarraitu du (25-19, 26-19, 27-19), eta erreboteak eramaten jakin du (27-20, 28-20).
Azken txanpan, Ansak bideratuta utzi du garaipena (29-20, 30-20), hirugarren urtez jarraian erremonteko buruz buruko txapelketa bereganatuta.
