Uxue Bilbao Basketek garaipena behar du Ratiopharm Ulmen aurka

Uxue Bilbao Basketek Ratipopharm Ulm talde alemaniarraren aurka jokatuko du Eurocup txapelketako final-laurdenetako itzulerako partida, astearte honetan Miribillan. Bizkaiko taldeak 85-81 galdu zuen joaneko partida, eta finalerdietarako txartela lortzeko, lau puntu baino gehiagogatik irabazi behar dio talde alemaniarrari. Partida Bizkaia Arenan jokatuko da 20:30ean, eta zuzenean eskainiko dute eitb.com-ek eta ETB-1ek.

Endesa Ligan Blancos de Ruedari irabaztetik dator Katsikarisek zuzentzen duen taldea, baina entrenatzaileari ez zitzaion gustatu bere jokalariek larunbateko partidan azaldu zuten jarrera. Entrenatzaile greziarraren helburua bere jokalariak partidan sartuta eta kontzentratuta egotea da.

Miribillan zaleen laguntza izango du  Bilbao Basketek, baina Ratiopharm Ulm ez da horregatik kokilduko. Cibona Zagreben eta Estrella Rojaren kantxa zailetatik garaile atera da Ulm, eta ez dizkio gauzak erraz jarriko Uxueri. Alemaniako partidan ikusi zeznez, Ulm taldeko izarra Joe Bryant da, baina jokalari honek asmatzen ez duenean, beste batzuk hartzen dute erantzunkizuna, eta maila ona eskaintzen dute gainera. Per Guenther, Lance Jeter, Keaton Nankivil eta Allan Ray argi utzi zuten zertarako gai diren.

Dena den, Bilbao Basketek kanporaketa irauli dezake. Miribillan bertsio onena eskaintzen du taldeak, eta horren erakusle dira iazko Euroligan Olympiakosen, Caja Laboralen, Real Madrilen eta CSKA Moskvaren aurka lortutako garaipenak. Eurocupean ere Valentziaren eta VEF Rigaren aurka garaipen garrantzitsuak lortu zituen taldeak Bizkaia Arenan.

Raul Lopezen egoerak kezkatuta ditu entrenatzailea, jokalariak eta zaleak. Azken hiru partidetan baja izan da, eta taldeak asko igartzen du. Astearte honetarako ere Raul Lopez baja izango da. Bestalde, Zisis ez zen egoera onenean iritsi larunbateko partidara, eta horrek ere kezkatuta dauka Katsikaris.