Bilbao Basketek garaipenarekin ekin nahi dio Eurokopari

Bilbao Basketek astearte honetan ekingo dio Eurokopari, eta Cedevita Zagreb izango du aurkari Bilbao Arenan. Partida 20:30ean hasiko da, eta zuzenean jarraitzeko aukera izango duzu eitb.com-en eta ETB1en bitartez.

Talde bizkaitarrak ez dio ondo ekin denboraldiari. Superkopako finalerdietan galdu egin zuen, eta Endesa Ligako lehen jardunaldian ere porrota jaso zuen. Rafa Puellok zuzentzen duen taldeak garaipena behar du txapelketari ondo ekiteko, eta Endesa Ligako partidetarako konfiantza hartzeko.

Aurrean Cedvita Zagreb talde gaztea izango du Bilbao Basketek. Kroaziako ligan hiru partida irabazi dituzte. Azkar eta kontraerasora jokatzea gustuko dute, eta ondo moldatzen dira erritmo biziko partidetan. Bilbao Basketek joko azkar hori eragotzi beharko du partida irabazi ahal izateko.