Arazoak alde batera utzi eta garaipena lortu nahi du Bilbao Basketek

Bilbao Basketek Badalonan jokatuko du igandean, FIATC Joventuten aurka. Bilbotarrek ezinbestekoa dute garaipena lortzea Malagan jokatuko den Errege Koparako sailkatu nahi badute.

'Beltzezko gizonak' hamaikagarren dira sailkapenean; sei garaipen lortu dituzte 14 patidatan, eta zortzigarren postua garaipen bakar batera dute. Joventut da, hain zuzen, zortzigarren postu horretan dagoen taldea.

Galtzaile atereaz gero, karanbola berezia beharko lukete azken bi jardunaldietan, hilabete barru Martin Carpenan jokatu ahal izateko.

Dena den, kirol arloa baino arazo ekonomikoak dira bilbotarrei buruko min handiena ematen dien gaia. Izan ere, Gorka Arrinda akziodun nagusiak aditzera emandako arazoek kolokan jarri dute Bilbao Basketen biziraupena, 14 urteren ondoren (gehienak, arrakastatsuak).

Gauzak argi adierazi ditu Arrindak: milioi eta erdi euroko diru-laguntza berehala jaso ezean, jokalariek taldetik ateratzeko askatasuna izango dute.