Bilbao Basket-Fuenlabrada (75-84): Bi postu galdu dituzte sailkapenean

Bilbao Basketek ezin izan du Fuenlabrada gainditu eta bilbotarrek bi postu galdu dituzte sailkapen nagusian. Mainoldik eta Valtersek azken laurdenean norgehiagoka madrildarren alde erabaki dute eta bizkaitarrek ezin izan diote markagailuari buelta eman. Porrot honekin, Katsikarisen taldea zazpigarren kokatu da.

Lehenengo laurdenean Fuenlabradak argi eta garbi agindu du kantxan, Valtersen saskiraketei esker, eta markagailuan aurrea hartu du. Chris Warren saskiraketekin erantzuna ematen saiatu da, baina madrildarrek jaurtiketa erabakigarriak lortu dituzte 13-16koa jartzeko.

Bigarren laurdenean Bilbao Basket norgehiagokan sartu da eta Janis Blumsen eta Marko Banicen saskiraketekin, 25-25ekoa lortu du. Bartonek, hiruko bati esker, 32-33 aurretik jarri ditu madrildarrak, baina Warrenek 37-33koa jarri du atsedenaldira bizkaitarrak markagailuan agintzen joateko.

Atsedenaldiaren ostean, Fuenlabradak asko sakatu du erasoan eta bizkaitarrek defentsan behar baino gehiago sufritu dute. Maindoldik hiruko garrantzitsuak lortu ditu talde laranjarentzat, baina Mumbruk eta Vasileiadisek, markagailua 55-55 jartzea lortu dute.

Azken laurdenean Katsikarisen mutilek ez dute intentsitate asko jarri kantxan eta Mainoldik eta Valtersek 72-77koa jartzeko aprobetxatu dute. Etxeko taldeak ezin izan du hiruko lerrotik saskiratu eta madrildarrek jaurtiketa libre erabakigarriak lortu dituzte. Azken emaitza 75-84 izan da, Salva Maldonadoren mutilen aldekoa.

- Fitxa teknikoa:

75 - Bizkaia Bilbao Basket (13+24+18+20): Jackson (11), Warren (13), Mumbru (10), Banic (16) eta Mavroeidis (-) -hasierako bostekoa-; Fisher (-), Blums (11), Vasileiadis (12), Hervelle (2) eta Sonseca (-).

84 - Baloncesto Fuenlabrada (16+17+22+29): Valters (16), Kus (5), Laviña (5), Barton (10) eta Ayon (4) -hasierako bostekoa-; Colom (7), Rabaseda (4), Cortaberria (4), Mainoldi (25) eta Guardia (4).