Bilbao Basket
Adierazpenak
Hervelle: 'Bolada onarekin jarraitzea garrantzitsua da'
Erredakzioa
Bilbao Basketeko jokalari belgikarrak argi utzi du Kopan ez duela oraindik pentsatzen, eta partidak irabazten jarraitu behar dutela esan du.
-
Hervelle. Argazkia: EFE
Axel Hervelle Bilbao Basketeko jokalariak Errege Kopan ez dutela oraindik pentsatzen azaldu du. Bilboko taldea sailkapeneko hirugarrena da, baina belgikar jokalariak "ahalik eta garaipen gehien" lortzen jarraitu behar dutela adierazi du.
"Pixkanaka joan behar dugu, ahal ditugun partida gehienak irabazita. Konfiantza hartzeko bolada onarekin jarraitzea ezinbestekoa da", esan du Axel Hervellek. Gainera, Cajasol Endesa Ligako hurrengo aurkaria "irregularra" izan arren, "oso arriskutsua" dela azpimarratu du.
"Cajasolek gauza asko aldatu ditu, eta oso arriskutsua da. Hala ere, behean ikusteak harritzen nau, entrenatzaile bikaina -Aito Garcia Reneses- dutelako. Edozein egunetan erritmoa hartu dezakete", esan du Hervellek.
Belgikarrak Bilbao Arenan ezin dutela hutsik egin, eta "ezustekorik ez izateko neurketako 40 minutuak prest" egon beharko dutela, onartu du.
