Bilbao Basket
Igandean, 12:15ean
Bilbao Basketek hirugarren postuari eutsi nahi dio
Erredakzioa
Fotis Katsikarisen mutilek Cajasol hartuko dute Bilbao Arenan. Bizkaiko taldeak bolada onari jarraipena emateko eta hirugarren postuari eusteko garaipena lortu behar du.
-
Argazkia: EFE
Bilbao Basketek partida garrantzitsua jokatuko du Miribillan (12:15ean) Cajasolen aurka. Katsikarisen mutilek Endesa Ligan eta Eurokopan jokatu dituzten 15 neurketatik 13 irabazi dituzte, eta helburua bolada onari jarraipena ematea da. Gainera, Bizkaiko taldeak sailkapeneko hirugarren postua mantendu nahi du.
Eurokopan B multzoko lehenengo postua ziurtatu dute beltzek. Bilbao Basketek partidak erabakitzeko sendotasun handia erakutsi du, eta Bilbao Arenan Bartzelona, Asefa Estudiantes, Unicaja, FIATC Joventut eta Assignia Manresa gainditu ditu. Katsikarisen mutilek, Errege Kopa jokatu ahal izateko, Cajasol ere gainditu beharko dute.
Vasileiadisek ez zuen jokatu Buducnosten aurkako neurketa, eta Sevillako taldearen aurka jokatzeko zalantza izango da. Bizkarrean kolpe gogorra jaso zuen Manresaren aurka, eta greziar jokalariak kantxara ondo sendatuta itzultzeko asmoa du.
Cajasolen aurka Bilbon jokatutako zortzi partidetatik Bilbao Basketek sei irabazi ditu, baina iragan denboraldian porrot mingarria jaso zuen (67-75).
