Laboral Kutxak gora egiten jarraitu nahi du

Baskoniak Valentzia Basket taldea hartuko du igandean Gasteizen (zuzenean, 12:00etan), beste garaipen bat lortu eta sailkapeneko goiko postuetan sartzeko helburuarekin.

Gasteiztarrak moralez gainezka daude Lietuvos Rytas mendean hartu eta Euroligako 16 talde onenen artean sartu ostean. Orain, Ligan bosgarren garaipena jarraian erdietsi nahi dute.

Horretarako Valentzia Basketi gailendu beharko zaio Buesa Arenan. Valentziarrak bigarren dira Endesa Ligako sailkapenean, Real Madrilen atzetik. Eurokopan, hala ere, arazo gehiago dituzte, eta oraindik ez dute lortu hurrengo faserako sailkatzea.

Aurreko jardunaldian, Sergio Scariolo arabarren entrenatzaileak adierazpen gogorrak egin zituen epaileen aurka, Laboral Kutxako jokalariei tratu ezberdina ematen zietela salatuta.