Baskonia
Buesa Arenan
Caja Laboral-Regal Bartzelona (87-80): Baskoniak garaipen ona lortu du
Josu Bilbao
Erredakzioa
Gasteiztarrek talde katalana gainditu egin dute, nahiz eta azken laurdena, markagailuan 10 puntu atzetik hasi duten. San Emeterio eta Teletovicen saskiraketak erabakiorrak izan dira azken laurdenean.
Garaipen ederra lortu du Ivanovicen taldeak Buesa Arenan, Xavi Pacualen Bartzelona indartsuaren aurka. Azken laurdenera markagailuan hamar puntu atzetik heldu dira gasteiztarrak, baina Teletovicen eta San Emeterioren lan onak 87-80koa eman diote Caja Laborali.
Arabarrek intentsitate handiarekin hasi dute partida eta puntuak ondo jokatuz eskuratu dituzte. Olesonek saskiraketa onak lortu ditu eta etxekoak 10-4 aurretik jarri dira. Hala ere Xavi Pascualen taldeak erritmo biziagoa jarri du eta Ricky Rubiori esker 14-16 aurretik jarri dira markagailuan. Ndongek lortutako saskiraketak 19-20koa jarri du kanpoko taldearentzat.
Bigarren laurdenean partida asko berdindu da bi taldeek defentsan ondo jokatu dutelako eta norgehiagokak intentsitate altua hartu du. Bartzelona markagailuan aurretik mantendu da, baina Olesonen eta Baracen lan bikainak 33-32koa jarri du Caja Laboralentzat. Marcelinho Huertasek bigarren zatiko azken segundoan saskiraketa ederra lortu du, 35-34koa jarriz.
Hirugarren laurdenean Mirza Teletovic azaldu da kantxan eta bere puntuekin Baskoniak 9 puntuko aldea lortu du (45-36). Xavi Pascualen taldeak erasoan asko sakatu du eta Lakovicek 47-47koa jarri du partida berdinduz. Fran Vazquezek eta Jordi Grimauk min handia egin diote Caja Laborali erasoan eta Bartzelona 10 puntuko aldeaz joan da azken laurdenera, 54-64.
Azken laurdenean Dusko Ivanovicek bigarren falta teknikoa jaso du eta Baskoniako entrenatzaileak aulkia utzi egin behar izan du. Hala ere, gasteiztarrak norgehiagokan ondo sartu dira eta San Emeterio eta Teletovicen saskiraketekin, 47-47koa jarri dute markagailuan. Kantabriarrak puntu erabakigarriak sartu ditu eta Caja Laboralek 87-80 gainditu du Regal Bartzelona.
- Fitxa teknikoa:
87 - Caja Laboral (19+16+19+33): Huertas (10), Oleson (18), San Emeterio (15), Haislip, Barac (15)-hasierako bostekoa-, Ribas, Logan (10), Teletovic (17), Rancik (2), Bjelica.
80 Regal Bartzelona (20+14+30+16): Rubio (15), Lakovic (6), Mickael (11), Lorbek (5), Perovic-hasierako bostekoa-, Vazquez (10), Sada (5), N''Dong (5), Morris (8), Ingles (10), Grimau (5).
