Saskibaloia
12. jardunaldia
Baskoniak, Bilbao Basketek eta GBCk igandean dute ligarekin hitzordua
Erredakzioa
eitb.eus-ek zuzenean eskainiko ditu UCAM Murtzia-Laboral Kutxa eta Joventut-Bilbao Basket neurketak.
-
Artxiboko irudia. Argazkia: EFE
Asteburu honetan 12. jardunaldiko partidak jokatuko dira ACB Ligan. Laboral Kutxak UCAM Murtziari egingo dio bisita (partida zuzenean eskainiko dute ETB-4k eta eitb.eus-ek, 12:30ean). Gasteiztarrentzat garrantzi handiko neurketa izango da, Koparako txartela jokoan baitute oraindik. Gainera, zazpi hilabete daramatzate Buesa Arenatik urrun irabazi barik.
Bilbao Basketek Joventuten aurka neurtuko ditu indarrak Badalonako Palaun (zuzenean ETB1en eta eitb.eus-en, 12:15ean). Bilbotarrek ere Errege Kopa jokatu nahi dute, eta badakite xede hori lortzeko gogor jarraitu behar dutela lanean. Real Madrilen aurka lortutako garaipen handiak konfiantza eman dio Sito Alonsoren taldeari. Beltzezko gizonak sailkapen nagusiko 4. postuan dira.
Azkenik, Gipuzkoa Basketek etxetik kanpoko bere lehen garaipena eskuratu nahi du Tenerifen (igandean, 13:30ean). Josep Franch joko-antolatzailea baja izango da. Gipuzkoarrek jarraipena eman nahi diote azken partidetan erakutsitako hobekuntzari.
