Saskibaloia
Eurokopako 4. jardunaldia
Lointek Gernikak Permuferias Avenida liderra hartuko du gaur Malosten
eitb.eus
Bizkaitarrak Salamancako taldea menderatzen saiatuko dira, Eurokopako F multzoko lehen postua eskuratzeko lehian sartzeko. Neurketa zuzenean ikusi ahalko da ETB4n eta eitb.eus-en.
-
Belen Arrojo, Quesos El Pastor taldearen aurkako partidan. Argazkia: Gernikasaski
Lointek Gernika Bizkaiak Perfumerias Avenida izango du aurkari gaur Malosten, 20:00etan, Eurokopako multzoen faseko laugarren jardunaldian. Neurketa hori bigarren itzuliko lehendabizikoa izango da.
Gernikarrak F multzoko bigarrenak dira, bi partida irabazi eta bakarra galdu ostean. Hain zuzen ere, asteazken honetan etxean hartuko duten taldearen aurka galdu zuten partida hori Mario Lopezek entrenatzen dituen neskek.
Salamancakoak, ostera, ligaxkan jokatutako lehia guztietan nagusitu dira, eta lehen postua eskuratzeko faborito argiak dira, baina kostata nagusitu ziren orduan, azken emaitzak erakusten duenez (62-59).
Dena dela, estreinako norgehiagoka hura galdu eta gero, gernikarrek ez dute arazorik izan multzoko beste bi aurkariak azpiratzeko: Hungariako Györ (77-41) eta Portugalgo Olivais (46-70).
Bestalde, Perfumerias Avenida Endesa Ligako azken jardunaldiak utzitako zapore garratza alde batera uzteko gogoz kantxaratuko da, galdu egin baitzuen bere zaleen aurrean, Girona liderraren kontra (55-68).
Neurketa 20:00etan hasiko da, eta zuzenean jarraitu ahal izango da, bai telebistaz (ETB4), bai Internetez (eitb.eus).
